قومی کرکٹ ٹیم کے کپتان مصباح الحق اور دیگر کھلاڑی ویسٹ انڈیز روانہ ہوگئے، قومی کرکٹ ٹیم ویسٹ انڈیز کے خلاف ٹیسٹ سیریز کھیلے گی ،انہوں نے کہا ہےکہ آخری سیریز یادگار بنانا چاہتا ہوں۔
کپتان مصباح الحق، اظہر علی، یاسر شاہ ،عثمان صلاح الدین اور محمد عباس سمیت دیگر کھلاڑی غیر ملکی ایئر لائن کے ذریعے لاہور سے ویسٹ انڈیز روانہ ہوئے ہیں۔ ایئر پورٹ پر میڈیا سے غیر رسمی گفتگو میں کپتان مصباح الحق نے کہا کہ وہ آخری سیریز کو یاد گار بنانا چاہتے ہیں ان پرکوئی دباؤنہیں اوروہ ریلیکس ہو کر کھیلیں گے۔ ویسٹ انڈیز نے ون ڈے میں کامیابی کے بعد ثابت کردیا ہے کہ وہ آسان حریف نہیں ۔ مصباح الحق کا کہناتھا کہ کسی نہ کسی دن تو ریٹائر ہونا ہی تھا ، اب وقت آگیا ہے۔آخر میں انہوں نے کہا کہ مجھے اس بات کا افسوس نہیں کہ آخری سیریز کھیلنے جا رہا ہوں۔
