اسلام آباد (نیوز ڈیسک) اینکر پرسن غریدہ فاروقی کا کہنا ہے کہ اپوزیشن کے تلوں میں تیل نہیں ہے، اے پی سی میں شہباز شریف کے بیانیے کی جیت ہوئی جبکہ مریم کا بیانیہ ٹوئٹر اور بیان بازی تک محدود رہا۔اپوزیشن کا اے پی سی اعلامیہ جاری ہونے کے بعد غریدہ فاروقی نے اسے مذاقِ سیاست قرار دے دیا اور کہا اپوزیشن نے اے پی سی کا شوق بھی پورا کر لیا۔ کھودا پہاڑ، نکلا کیا ؟ پہلے ہی کہا تھا اِس اپوزیشن کے تلوں میں تیل نہیں ہے ۔ آج کا اعلامیہ کہتا ہی کہ عوامی مفاد میں اپوزیشن کو کسی ایک متفقہ بیانیہ اور لائحہ عمل پر اکٹھا ہونا ہو گا۔ غریدہ فاروقی نے متفقہ بیانیے اور لائحہ عمل پر اکٹھے ہونے کی بات پر سوال اٹھایا کہ ’ تو بھئی آج کا اِکٹھ کس واسطے تھا پھر؟۔‘اینکر پرسن کا مزید کہنا تھا کہ ’نشستند ، گفتند ، برخاستند ، اپوزیشن کی ناکام اے پی سی ، پہلے ہی کہا تھا اِن تلوں میں تیل نہیں، بِن کھلے مرجھا گئی۔۔۔ اے پی سی تھی یا مذاقِ سیاست ؟۔‘مریم نواز کے جارحانہ اور شہباز شریف کے مصالحانہ بیانیے کے حوالے سے ایک ٹویٹ میں غریدہ فاروقی نے کہا ’آج کے اے پی سی اعلامیہ سے ن لیگ کی حد تک تو واضح ہو گیا کہ شہباز بیانیہ حاوی رہا۔ مریم نواز بیانیہ محض تقریر اور ٹویٹس کی حد تک ہی رہا اور رہے گا۔‘