Timer gara: The funeral prayers of martyres of Pak army personnel in Sherot kai

تیمر گرہ: تیمر گرہ کے علاقے شیروٹ کئی میں شہید ہونے والے پاک فوج کے میجر علی سلمان اور حوالدار اخترعلی کی نماز جنازہ پشاور گیریژن میں ادا کردی گئی ۔ شیروٹ کئی میں پاک فوج نے دہشتگردوں کی موجودگی کی خفیہ اطلاع پر آپریشن کیا ۔ گھیرے میں لئے جانے پر دہشتگردوں نے فائرنگ کردی ، ایک دہشتگرد نے خود کو دھماکے سے اڑا دیا جبکہ دوسرا سیکیورٹی اہلکاروں کی فائرنگ سے ہلاک ہوگیا اورایک دہشتگرد کو گرفتار کرلیا گیا۔ آپریشن کے دوران پاک فوج کے میجر علی سلمان ، حوالدار اختر علی ، حوالدار غلام نذیر اور سپاہی عبدالکریم نے جام شہادت نوش کیا ۔ میجر علی سلمان اور حوالدار اختر علی کی نماز جنازہ پشاور گیریژن میں ادا کی گئی ۔ نماز جنازہ میں کور کمانڈر پشاور میجر جنرل نذیر بٹ ، صوبائی وزیر شاہ فرمان ، آئی جی ایف سی لیاقت خان ، آئی جی پولیس صلاح الدین محسود سمیت سول افسران اور پاک فوج کے جوانوں نے بڑی تعداد میں شرکت کی ۔ نماز جنازہ کے بعد شہداء کے جسد خاکی ان کے آبائی علاقوں کو روانہ کر دیئے گئے۔