کراچی: ایم کیو ایم پاکستان کے سربراہ ڈاکٹرفاروق ستار کا کہنا ہے ہم نے ایک اچھے مقصد کے لئے آل پارٹیز کانفرنس بلائی تھی لیکن تمام جماعتوں نے حامی بھرنے کے بعد معذرت کرلی اس بائیکاٹ کے پیچھے ضرور کسی کا ہاتھ ہے۔

There is someone else behind the boycott of a multi-coalition conference, Farooq Sattar

انسداد دہشت گردی عدالت کے باہر میڈیا سے بات کرتے ہوئے فاروق ستار کا کہنا تھا کہ  ہم نے 22 اگست کے واقعے کی مذمت کی تھی  اور اسی دن پاکستان مخالف عناصر سے علیحدگی کا بھی اعلان کردیا تھا امید ہے ہمیں ضرور انصاف ملے گا۔ فاروق ستار کا کہنا تھا کہ ہم نے اچھے مقصد کے لیے آل پارٹیز کانفرنس بلائی تھی اور جب سیاسی جماعتوں کو دعوت دی گئی تو ناصرف ہمارا والہانہ استقبال کیا گیا بلکہ ہماری دعوت کو قبول بھی کیا گیا لیکن جس روز کانفرنس تھی ہمیں 2 گھنٹے قبل میڈیا کے ذریعے پتہ چلا کہ تمام سیاسی جماعتوں نے ایک ساتھ ہی بائیکاٹ کردیا ہے جو ہمارے لیےاچھنبےکی بات ہے اور تمام سیاسی جماعتوں کے ایک ساتھ بائیکاٹ کے پیچھے ضرور کوئی بات اور کسی کا ہاتھ ہے۔ ان کا کہنا تھا کہ عوام ہمارے اچھے مقصد کا بائیکاٹ کرنے والی سیاسی جماعتوں کا 2018 کے عام انتخابات میں بائیکاٹ کریں گے۔