اسلام آباد (ویب ڈیسک) وزیراعظم عمران خان نے اقتدار میں آنے سے قبل اور اقتدار میں آنے کے بعد پاکستانی عوام سے کچھ وعدے کیے تھے جنہیں عملی جامہ پہنایا جا رہا ہے۔ نجی ٹی وی چینل کے پروگرام میں گفتگو کرتے ہوئے پاکستان تحریک انصاف کے رہنما اور وفاقی وزیر تعلیم شفقت محمود نے کہا کہ وزیراعظم عمران خان عوام سے کیا ہوا اپنا ایک اور وعدہ پورا کرنے جا رہے ہیں۔ عمران خان نے گورنر ہاؤسز کو عوام کے لیے کھولنے کا وعدہ کیا تھا جسے پورا کر دکھایا اور اب عوام کی ایک بڑی تعداد گورنر ہاؤسز کا دورہ کرتی ہے ۔ عمران خان نے وزیراعظم ہاؤس کو یونیورسٹی بنانے کا بھی وعدہ کیا تھا جس پر عملی اقدامات شروع کر دئے گئے ہیں۔ شفقت محمود نے بتایا کہ وزیراعظم ہاؤس کو ایک اعلیٰ درجے کی یونیورسٹی بنایا جائے گا جہاں انڈر گریجویٹ نہیں بلکہ ایم فل اور پی ایچ ڈی کے طلبا ہوں گے۔ انہوں نے کہا کہ وزیراعظم ہاؤس کو ایک باقاعدہ ریسرچ سینٹر نوعیت کا ادارہ بنایا جائے گا جہاں سائنسز اور سوشل سائنسز کے طلبا ہوں گے۔ اس ادارے کو انسٹی ٹیوشن آف Excellence بنانے کے لیے ہی یہاں طلبا کی تعداد دو ہزار تک رکھی جائے گی، اس حوالے سے آج بدھ کے روز وزیراعظم کو مختلف پریزنٹیشن دی جائیں گی۔ جہاں تک باقی پراپرٹیز کا تعلق ہے اس حوالے سے بھی ریویو میٹنگز کی جا رہی ہیں۔ ان تمام چیزوں کو ایک خاص طریقے سے عملی جامہ پہنایا جائے گا۔ یاد رہے کہ عمران خان نے وزارت عظمیٰ کا منصب سنبھالتے ہی وزیراعظم ہاؤس میں رہائش اختیار نہ کرنے کا فیصلہ کیا تھا۔عمران خان نے وزیراعظم ہاؤس کی بجائے ملٹری سیکرٹری کے گھر میں رہائش اختیار کی جبکہ وزیراعظم ہاؤس کو اعلیٰ پایہ کی یونیورسٹی بنانے کا وعدہ کیا تھا۔