ماسیرو: افریقی ملک لیسوتھو کے نومنتخب وزیراعظم ٹام ثابانی کی حلف برداری کے کچھ ہی گھنٹے بعد ان کی اہلیہ کو گولی مار کر قتل کردیا گیا۔
غیر ملکی خبر ایجنسی کے مطابق افریقی ملک لیسوتھو کے نومنتخب وزیراعظم ٹام ثابانی کی 58 سالہ اہلیہ لیپولیلو ثابانی اپنی دوست کے ہمراہ گھر واپس جارہی تھیں کہ دارالحکومت ماسیرو کے مضافاتی علاقے میں نامعلوم افراد نے ان کی گاڑی پر فائرنگ کردی جس کے نتیجے میں دونوں خواتین ہلاک ہوگئیں۔ مقایم ذرائع ابلاغ کے مطابق وزیراعظم کی اہلیہ نے طلاق کا کیس دائر کیا ہوا تھا اور دونوں 5 سال سے ایک دوسرے سے علیحدہ رہ رہے تھے تاہم دونوں میں تاحال طلاق نہیں ہوئی تھی۔ واضح رہے کہ 2014 میں ناکام فوجی بغاوت کے بعد سے لیسوتھو سیاسی انتشار کا شکار ہے۔ گزشتہ ہفتے وہاں الیکشن ہوئے جن میں ٹام ثابانی وزیراعظم منتخب ہوئے تھے تاہم اس واقعے کے بعد ملک میں سیاسی انتشار کی نئی لہر جنم لینے کا خطرہ ہے۔
