اسلام آباد: نگراں وزیراعظم کے معاملے پر وزیراعظم شاہد خاقان عباسی اور اپوزیشن لیڈر خورشید شاہ کے درمیان آج ایک بار پھر اہم ملاقات ہوگی۔
وزیراعظم شاہدخاقان عباسی اوراپوزیشن لیڈرخورشیدشاہ کے درمیان آج ایک بار پھر اہم ملاقات ہوگی جس میں نگران وزیر اعظم کے نام پر اتفاق رائے کی کوشش کی جائے گی، پیپلزپارٹی کی جانب سے سابق چیئرمین پی سی بی ذکا اشرف اور سابق سیکریٹری خارجہ جلیل عباس جیلانی کے نام تجویز کیے گئے ہیں جب کہ تحریک انصاف کی جانب سے سابق چیف جسٹس تصدق حسین جیلانی، عبدالرزاق داؤد اور سابق گورنر اسٹیٹ بینک ڈاکٹر عشرت حسین کے نام تجویزکیے گئے ہیں۔
خورشید شاہ کا کہنا ہے کہ امید ہے نگراں وزیراعظم کے نام پر آج فیصلہ کرلیں گے جب کہ دوسری جانب ترجمان تحریک انصاف فواد چوہدری نے پیپلزپارٹی کے تجویز کردہ نام مسترد کرتے ہوئے کہا ہے کہ ذکاء اشرف، آصف زرداری کے مین ڈونر اور مرکزی مجلس عاملہ کے ممبر ہیں لہذا ذکاء اشرف کا نام مسترد کرتے ہیں جب کہ جلیل عباس جیلانی کے نام پر ہمیں زیادہ خدشات نہیں۔
