کراچی : سلمان اقبال فلمز اور ندیم بیگ کی ہدایات میں بننے والی رومانوی اور مزاحیہ فلم ’پنجاب نہیں جاؤں گی‘ عید الفطر کے روز مداحوں کے لیے اے آر وائی ڈیجیٹل پر پیش کی جائے گی۔

تفصیلات کے مطابق سلمان اقبال فلمز، اے آر وائی فلمز، اور سکس سگما پلس کی مشترکہ پیشکش اور ندیم بیگ کی ہدایات میں بننے والی رومانوی اور کامیڈی فلم ’پنجاب نہیں جاؤں گی‘ عید الفطر کے روز اے آر وائی ڈیجیٹل پر دکھائی جائے گی۔

جوانی پھر نہیں آنی کا ریکارڈ توڑنے والی رومانوی اور کامیڈی فلم ’پنجاب نہیں جاؤں گی‘ کا عید الفطر کے روز  ورلڈ وائڈ پریمیئر ہوگا۔

پاکستان میں بھرپورپذیرائی حاصل کرنے کے ساتھ ساتھ فلم ’’پنجاب نہیں جاؤں گی‘‘ نے عالمی سطح پر بھی باکس آفس کے نئے ریکارڈ قائم کیے تھے، جو50 کروڑ روپے کمانے والی پہلی پاکستانی فلم بن تھی۔

فلم ڈسٹری بیوٹرز، سنیما مالکان اور میڈیا رپورٹس کے مطابق گذشتہ برس جن فلموں نے بہت اچھا بزنس کیا تھا اور شہرت پائی تھی، ان میں ’’پنجاب نہیں جاؤں گی‘‘ سر فہرست تھی۔

گاؤں کے لڑکے اور شہرکی لڑکی کی محبت پر مبنی فلم میں ہیروئن کو پنجاب نہ جانے کی ضد اب بھی ہے۔ مذکورہ فلم کی کہانی ہمایوں سعید، مہوش حیات اور عروہ حسین کے درمیان تکونی محبت (ٹرائی اینگل) کے گرد گھومتی ہے، فلم کے دیگر کرداروں میں احمد علی بٹ اور صبا وسیم بھی شامل ہیں، جبکہ ہمایوں سعید فلم کے پروڈیوسر بھی ہیں۔