دبئی………. پاکستان سپر لیگ کے ساتویں میچ میں کوئٹہ گلیڈی ایٹرز نے پشاور زلمی کو 3 وکٹوں سے شکست دیدی، شاہد آفریدی کی پشاور زلمی نے کوئٹہ گلیڈی ایٹرز کو 136 رنزکا ہدف دیا تھا۔
کوئٹہ گلیڈی ایٹرز کے کھلاڑی وقتاً فوقتاً آئوٹ ہوتے رہے تاہم پیٹرسن ایک اینڈ پر جمے رہے، یوں سرفراز احمد کی ٹیم نے شاہد آفریدی کی ٹیم کو آخری اوور میں شکست دے دی۔کوئٹہ گلیڈی ایٹرز کے کپتان سرفراز احمد نے ٹاس جیت کر فیلڈنگ کا فیصلہ کیا تو پشاور زلمی کی پہلی وکٹ 22کے اسکور پر گری جب تمیم اقبال 14رنز بناکر محمد نواز کا شکار بننے ،دو رنز کے اضافے کے ساتھ ہی دوسرے اوپنر محمد حفیظ بھی پویلین لوٹ گئے۔اس کے بعد کامران اکمل اور ملن اسکور 43تک لے گئے ،اس موقع پر کامران اکمل 6رنز بناکر ذوالفقار بابر کی گیند پر کیچ آئوٹ ہوگئے،59کے اسکور پر ملن بھی ہمت ہار گئےاور عمرگل کی گیند پرسرفراز احمدکو کیچ تھما بیٹھے ،ملن نے 1چوکے اور 1چھکے کی مدد سے 18رنز بنائے،اسی اوور میں کپتان شاہد آفریدی بھی بنا کھاتا کھولے پویلین کو لوٹ گئے۔پشاور زلمی کی چھٹی وکٹ 116کے اسکور پر گری جب شاہد یوسف 21رنز بناکر محمد نواز کی گیند پر آئوٹ ہوئے، جس کے بعدڈیری سیمی اور وہاب ریاض نے اسکور میں مزید 13رنز کا اضافہ کیا،آخری اوور میں 48رنز بنانے والے ڈیرین سیمی محمد نواز کا شکار بن گئے۔کوئٹہ گلیڈی ایٹرز کی جانب سے محمد نواز نے 3،عمر گل نے 2 جبکہ ذوالفقار بابر اور انور علی نے 1،1کھلاڑی آئوٹ کئے۔
