لوگ لنڈا بازار سے گرم ملبوسات کی خریداری میں مصروف تھے کہ اچانک زوردار دھماکا ہو گیا۔ زخمیوں اور نعشوں کو کرم ایجنسی ہیڈ کوارٹرز منتقل کر دیا گیا، متعدد زخمیوں کی حالت تشویشناک
پارا چنار: (یس اُردو ویب ڈیسک) پارا چنار کے عید گاہ لنڈا بازار میں دھماکا اس وقت ہوا جب لوگوں کی بڑی تعداد خریداری میں مصروف تھی کہ اچانک زوردار دھماکا ہو گیا۔ دھماکے کے نتیجے میں 22 افراد جاں بحق جبکہ متعدد زخمی ہو گئے۔ دہشتگردی کے واقعہ کی اطلاع ملتے ہی قانون نافذ کرنے والے اداروں کے اہلکار اور امدادی ٹیمیں موقع پر پہنچ گئیں۔ دھماکے میں زخمی افراد اور نعشوں کو قریبی ہسپتالوں میں منتقل کر دیا گیا جہاں متعدد کی حالت تشویشناک بتائی جاتی ہے جس کے باعث ہلاکتوں میں اضافے کا خدشہ بھی ظاہر کیا گیا ہے۔ آئی ایس پی آر کے مطابق دھماکے میں شدید زخمی ہونے والے 24 لوگوں کو آرمی ایوی ایشن کے ہیلی کاپٹرز میں پشاور منتقل کیا جا رہا ہے۔
پولیس اور قانون نافذ کرنے والے اداروں نے جائے وقوع پر پہنچ کر علاقے کو گھیرے میں لے لیا اور واقعے کی تفتیش شروع کر دی۔ رپورٹ کے مطابق جائے وقوع سے 2 مشتبہ افراد کو بھی گرفتار کر لیا گیا جن سے تفتیش کا عمل شروع کر دیا گیا ہے۔ ابتدائی تحقیقات کے مطابق دھماکے میں 25 کلوگرام بارود استعمال کیا گیا تھا۔
