Pakistan Team

کولمبو : پاکستان سری لنکا کے خلاف ٹی ٹوئنٹی میں دوسری فتح کے ساتھ سیریز اپنے نام کرنے کو بے تاب ہے اور دوسرے میچ میں بھی جارح مزاج عمراکمل اور تجربہ کار شعیب ملک نگاہوں کا مرکز ہوں گے۔

کولمبو کے پریماداسا کرکٹ اسٹیڈیم میں میچ پاکستانی وقت کے مطابق شام ساڑھے 6 بجے شروع ہوگا۔ ان فارم شاہد آفریدی الیون میں کسی تبدیلی کا امکان نظر نہیں آتا اگر مینجمنٹ نے کوئی تجربہ کرنے کا فیصلہ کیا تو مختاراحمد کی جگہ نعمان انور یا سرفرازاحمد میں سے کسی ایک کو میدان میں اتارا جاسکتا ہے۔

دوسری جانب آئی لینڈرز دہری مشکلات کا شکار نظر آتے ہیں، پہلے میچ میں جے سوریا کا انداز اپنانے کے لیے کوشاں نوجوان کوشل پریرا کے ساتھ دوسرے تجربہ کار اوپنر تلکا رتنے دلشان بھی ناکام رہے تھے،انجیلو میتھیوز کا ذمہ دارانہ کھیل بھی اچھے اسکور کی امید دلاسکتا ہے جب کہ بینورا فرنانڈو کی جگہ نوان کولاسیکرا کو میدان میں اتارنے جانے کا امکان موجود ہے۔

اس وقت عالمی چیمپئن سری لنکا 130 پوائنٹس کے ساتھ سرفہرست ہے، آسٹریلیا 122 پوائنٹس کے ساتھ دوسرے، بھارت 118 کے ساتھ تیسرے نمبرپرہے، پاکستان اور ویسٹ انڈیز کے یکساں 117 پوائنٹس ہیں، گرین شرٹس کی فتح 4 قیمتی پوائنٹس کے ساتھ بھارتی ٹیم کو پیچھے دھکیلنے کے لیے کافی ہوگی۔