فیصل آباد : پاکستان پیپلز پارٹی کے ضلعی جنرل سیکرٹری وٹکٹ ہولڈر پی پی 62محمد اعجاز چوہدری نے کہا ہے کہ پاکستان پیپلزپارٹی سعودی وزیردفاع محمد بن سلمان کے دورہ پاکستان کا خیرمقدم کرتی ہے۔ دونوں ملکوں کے درمیان مثالی تعلقات ہیں۔ سعودی عرب جیسے برادر ملک کی سلامتی کا تحفظ پاک آرمی کے ہمقدم اپنی جانوں سے کریں گے۔
تاہم ایران اور سعودی عرب کے درمیان کشیدگی کو روکنے کیلئے شہید ذوالفقار علی بھٹو کا فارمولا اپنایا جائے۔ مسلم امہ کے مسائل کا حل اسلامی سربراہی کانفرنس لاہور کے طرز پر امت مسلمہ کے اتحاد میں مضمر ہے۔ نیشنل ایکشن پلان اور کرپشن کے خلاف آپریشن کے نام پر اقتدار پر جابرانہ قبضے کی خاطر بعض لوگ پیپلزپارٹی کو بدنام کرنے کی ناکام کوشش کررہے ہیں۔
ڈویژنل سیکرٹری اطلاعات پی ایل بی محمد طاہر شیخ نے کہا کہ قائد عوام شہید ذوالفقار علی بھٹو نے مزدور، کسان، ہاری، طالبعلموں اور معاشرے کے ہر پسے طبقے کو ان کے حق سے شناسا کیا اور عملی طور پر ان کی فلاح وبہبود کیلئے کا م کیا۔ عوام کی شہید بھٹو سے محبت تیسری نسل کے سینوں میں بھی اسی طرح ٹھاٹھیں مار رہی ہے جس طرح 1970میں تھی۔انہوں نے کہا سابق وزیراعظم وبانی پاکستان پیپلزپارٹی شہید ذوالفقار علی بھٹو نے اسلام وپاکستان کیلئے گراں قدر خدمات انجام دیں۔
پیپلزپارٹی کے سینئر رہنما محمدیونس ہمدم، حاجی لیاقت شہباز، باؤ افتخار اور سرمد فضل حسین راہی نے کہا کہ کوئی مذہبی مسئلہ ہو یا سیاسی مسئلہ اسکا بہترین حل نکالا اور قوم کو متحد رکھا۔ اگر آج بھی قومی لیڈر ذوالفقار علی بھٹو کی پالیسیاں جاری رکھیں تو پاکستان دنیا بھر میں نمایاں مقام حاصل کرسکتا ہے۔
