Pakistan in Kolkata

کول کتہ……بھارت کےخلاف ٹی ٹوئنٹی کرکٹ میںفتح کا خواب شرمندہ تعبیر نہ ہو سکا،کولکتہ میں بھی پاکستان بھارت کے ہاتھوں 6وکٹ سے شکست کھا گیا۔
پاکستان کی جانب سے دیاجانے والا119رنز کا ہدف محفوظ نہیں تھا تاہم پاکستانی بولنگ اٹیک کو دیکھتے ہو ئے اور بھارت پرنفسیاتی دبائو کے سبب کانٹے دارمقابلہ متوقع تھا تاہم بیٹنگ کے بعد بولنگ بھی امید پر پوری نہ اتر سکی اور بھارت کےخلاف کولکتہ میںشا ندار پاکستانی ریکارڈ بھی آج کام نہ آسکا ۔محمد سمیع نے دو متواتر گیندوں پرشیکھر دھون اور سریش رائنا کوبولڈ کرکے کچھ امید پیدا کی لیکن یہ امید عارضی ثابت ہو ئی اور ویرات کوہلی پاکستانی خواہش کے آڑے آگئے اور بھارت کو پاکستان کے خلاف6وکٹوں سے فتح دلوادی۔ویرات کوہلی کو55رنز کی ناقابل شکست اننگ پر میچ کا بہترین کھلاڑی قرار دیا گیا۔اس سے قبل کول کتہ میںپاک بھارت کے میچ کا ٹاس مہندرا سنگھ دھونی نے جیتا اور پاکستان کو بیٹنگ کی دعوت دی ،پاکستانی اپنرز شرجیل خان اور احمد شہزاد نے محتاط اندازمیں بیٹنگ شروع کی اور38رنز کا آغاز فراہم کیا،پہلے آئوٹ ہونے والے بیٹسمین شرجیل خان تھے،انہوںنے17رنز بنائے،احمد شہزادبھی زیادہ بڑی اننگ نہ کھیل سکے اور25رنز بنا کرپویلین لوٹ گئے۔ون ڈائون پوزیشن پرکھیلنے کپتان شاہد آفریدی آئے لیکن بنگلہ دیش کیخلاف بیٹنگ کی جھلک نہ دکھا سکے اور صرف8رنز بنا کرپانڈیا کی گیند پرویرات کوہلی کو کیچ دے بیٹھے، اس موقع پر عمر اکمل کو بیٹنگ میںپروموٹ کیا گیا اورچوتھے نمبر بھیجا گیا لیکن وہ بھی کھل کر بیٹنگ نہ کرسکے اور22رنز بنا کرکیپر دھونی کو کیچ دے بیٹھے ۔شعیب ملک نے پر اعتماد اننگ کھیلی انہوں نے پاکستان کی جانب سے سب سے زیادہ 26رنز بنائے،وہ اونچا شاٹ کھیلنے کی کوشش میں اشیش نہرا کا شکار بنے۔سرفراز احمد8اور محمد حفیظ5رنز بنا کر ناٹ آئوٹ رہے،یوں پاکستان نےمقررہ18اوورز میں5وکٹ کے نقصان پر118رنز بنا کر بھارت کو میچ میں فتح کےلئے119رنز کا ہدف دیا۔بھارت کی جانب سے پانڈیا،بمرا ،نہرا،جدیجااور سریش رائنا نے ایک ایک وکٹ حاصل کی