Our relationship

آسماں بدلتا ہے رنگ کیسے کیسے، پیپلز پارٹی کے رہنماؤں نے عزیر بلوچ سے ہر قسم کے تعلق سے انکار کر دیا، کہتے ہیں ملزموں سے ہمارا کیا تعلق، آج کل تو کوئی بھی کسی سیاسی لیڈر کے ساتھ سیلفی بنا لیتا ہے۔
کراچی: (یس اُردو) عزیر بلوچ کی گرفتاری کے بعد پیپلز پارٹی کے رہنما عجیب پریشانی میں مبتلا ہیں، کوئی اسے پہچاننے کو ہی تیار نہیں۔ اپوزیشن لیڈر خورشید شاہ کہتے ہیں بھائی ہمارا مطلوب ملزم سے کیا تعلق، سیاست دانوں کے ساتھ سیلفیاں بنانے کا فیشن چل رہا ہے۔کہتے ہیں برے وقت میں تو سایہ بھی ساتھ چھوڑ جاتا ہے تو عزیر بلوچ کے ساتھ بھی یہی کچھ ہو رہا ہے۔ وزیر اعلیٰ سندھ کہتے ہیں عزیر سے کوئی واسطہ نہیں مجرموں کی گرفتاری ہونی چا ہئے۔ سائیں کا یہ بھی کہنا ہے کہ عزیر بلوچ ذوالفقار مرزا کا دوست ہے، اب وہی جانیں۔ سابق وزیر اعظم یوسف رضا گیلانی نے بھی اس معاملے پر کھل کر بولنے سے انکار کر دیا۔
سیانوں کا کہنا ہے کہ وقت ایک سا نہیں رہتا، کبھی کے دن بڑے تو کبھی کی راتیں۔ ایک دن پہلے سندھ کے سینئر وزیر نثار کھوڑو نے عزیر بلوچ کو پہچاننے سے ہی انکار کر دیا تھا۔