وزیر اعلیٰ پنجاب شہباز شریف کا کہنا ہے کہ مقبوضہ بیت المقدس کے مسئلے پر امت نے یک زبان ہو کر امریکی فیصلے کی مخالفت کی، اس مسئلے پر ترک صدر کا کردار مثالی رہا ۔وزیراعلیٰ شہباز شریف اور ترک وزیراعظم بن علی یلدرم کے درمیان مدینہ منورہ میں مسجد نبوی کے داخلی دروازے کے باہر ملاقات ہوئی، دونوں رہنماؤں نے گرمجوشی سے مصافحہ کیا اور گلے ملے، ایک دوسرے کی خیریت دریافت کی اور نیک خواہشات کا اظہار کیا۔

اس موقع پر شہبازشریف کا کہنا تھا کہ ترک وزیراعظم سےمسجد نبویﷺ کےمقدس ترین مقام پرملنےکی بہت خوشی ہوئی، پاکستان اورترکی برادر اسلامی ممالک ہیں، مقبوضہ بیت المقدس کےمسئلہ پرامت نےیک زبان ہوکرامریکی فیصلےکی مخالفت کی، مقبوضہ بیت المقدس کےمسئلےپرترک صدر رجب طیب اردوان کاکردارمثالی رہا ہے۔ترک وزیراعظم بن علی یلدرم کا کہنا تھا کہ اپنے بھائی شہبازشریف سے ملاقات کی بہت مسرت ہوئی ہے، مسجد نبویﷺ میں ایک بزرگ خاتون نے شہباز شریف کو دیکھ کر کر پیار کیا، گلے لگایا اور ڈھیروں دعائیں دیں۔ سوشل میڈیا پر جاری اپنے ایک پیغام میں شہباز شریف نے کہا کہ لوگوں کے پیار اور محبت نےان کا دل چھو لیااور جس طرح خیر مقدم کیا وہ انتہائی خوش کن ہے ۔

شہباز شریف نے کہا مسجد نبویﷺ میں حاضری کی سعادت روحانی طور پر بہت اعلیٰ تجربہ رہا ہے، خداپاک ہمارے گناہ معاف کرے ۔