لندن(ویب ڈیسک) شاہ رخ خان کے مداح تو بے شمار ہیں اور اب ملالہ یوسفزئی نے ان کے فلم ‘زیرو’ دیکھنے کے بعد ان کو پیغام بھیض دیا ہے۔ نوبل انعام یافتہ پاکستانی طالبہ ملالہ یوسفزئی نے فلم’زیرو‘دیکھنے کے بعد بالی ووڈ کنگ شاہ رخ خان کے نام ویڈیو پیغام جاری کیا ہے جس میں انہوں نے فلم میں کنگ خان کی اداکاری کو بے حد سراہا ہے۔ ملالہ یوسفزئی بالی ووڈ کے بادشاہ شاہ رخ خان کی بہت بڑی مداح ہیں اور ان کی اداکاری کو بے حد پسند کرتی ہیں جس کا اظہار وہ بارہا کرچکی ہیں۔ ملالہ حال ہی میں اپنی فیملی کے ہمراہ فلم’زیرو‘دیکھنے سینما پہنچیں اور فلم دیکھنے کے بعد ایک ویڈیو پیغام کے ذریعے شاہ رخ خان کی اداکاری کی تعریف کرتے ہوئے کہا’آپ کی فلم دیکھ کر بہت اچھا لگا، فلم پُرمزاح تھی اور میری پوری فیملی کو بہت پسند آئی۔ ملالہ کا کہنا ہے کہ شاہ رخ میں آپ کی بہت بڑی مداح ہوں، آپ کے ساتھ ٹوئٹر پر بات کرنا بہت اچھا لگتا ہے، امید کرتی ہوں ایک دن آپ آکسفورڈ یا برطانیہ میں کہیں بھی آئیں گے تو ہماری ملاقات ہوگی اور وہ دن میری زندگی کا بہت بڑا دن ہوگا۔ آپ بہترین اور حیرت انگیز شخص ہیں، ہر کوئی آپ سے یہ بات کہتا ہوگا لیکن میں ایک بار پھر دُہرارہی ہوں آپ بہت حیرت انگیز اور اچھے انسان ہیں‘۔واضح رہے کہ شاہ رخ خان، کترینہ کیف اور انوشکا شرما کی فلم’زیرو‘ریلیز کے پہلے روز اوسط درجے کا بزنس کرنے میں کامیاب ہوئی ہے تاہم ویک اینڈ اورکرسمس کی چھٹیوں کے باعث توقع کی جارہی ہے کہ فلم آنے والے دنوں میں اچھا بزنس کرے گی۔