ممبئی: بالی ووڈ کنگ شاہ رخ خان اور دبنگ اسٹار سلمان خان ایک بار پھر چھوٹی اسکرین پر نظر آئیں گے لیکن ایک ساتھ نہیں بلکہ ایک دوسرے کے حریف بن کر۔

King and dabangg Khan again face to face

بھارتی فلم انڈسٹری کے دو بڑے خان سلمان اور شاہ رخ کا رشتہ کچھ کھٹا اور میٹھا ہے، کبھی تو دونوں کے درمیان دشمنی اس حد تک بڑھ جاتی ہے کہ دونوں ایک دوسرے کی شکل دیکھنا بھی گوارا نہیں کرتے اور کبھی دوستی کے سارے ریکارڈ توڑتے ہوئے ایک دوسرے کو بھائیوں سے بڑھ کر قرار دیتے ہیں، فی الحال بالی ووڈ کے دونوں روایتی حریفوں کے درمیان طویل عرصہ سے چلتی آرہی دشمنی گہری دوستی میں تبدیل ہوچکی ہے، لیکن اب اطلاعات ہیں کہ دونوں کی دوستی پر ایک بار پھر دشمنی کی خطرناک تلوار لٹکتی نظر آرہی ہے۔

بھارتی میڈیا کے مطابق شاہ رخ اور سلمان خان صرف فلموں کے ہی نہیں بلکہ ٹی وی کے بھی سپر اسٹارز ہیں اور دونوں بھارتی ٹی وی کے پروگرامز کی میزبانی کرکے لوگوں کے دلوں پر راج کرتے ہیں، سلمان خان مقبول ترین شو بگ باس کے گزشتہ 8 سیزن کی میزبانی کرتے آرہے ہیں جب کہ شاہ رخ خان بھی ٹی وی پر مختلف شوز کرتے رہتےہیں، جو عوامی مقبولیت حاصل کرتے ہیں ، لیکن اب یہ دونوں اداکار ایک ہی وقت میں مختلف شوز کرتے نظر آئیں گے۔ سلمان خان کا مقبول ترین شو ’’بگ باس‘‘ سیزن 11 رواں سال اکتوبر میں رات 9 بجے نشر کیا جائے گا، جب کہ شاہ رخ خان اسٹار پلس پر ’’نئی سوچ‘‘ کے نام سے شو کی میزبانی کرتے نظر آئیں گے جو اسی وقت یعنی رات 9 بجے نشر کیا جائے گا، بھارتی چینل اسٹار پلس کی انتظامیہ نے دونوں شوز کے درمیان ہونےوالے تصادم سے متعلق اپنی تشویش کا اظہار کرتے ہوئے کہا ہے کہ دونوں پروگرامز میں بھارت کے سپر اسٹارز نظر آئیں گے جس سے شوز کی ریٹنگ اور ٹی آر پی بہت زیادہ متاثر ہوگی ،لیکن دونوں پروگرامز کی طرز اور کہانی ایک دوسرے سے بالکل مختلف ہے لہٰذا ہمیں یقین ہے کہ دونوں شوز عوام میں یکساں مقبولیت حاصل کریں گے۔

واضح رہےکہ ’’بگ باس‘‘ بھارتی ٹی وی کا مقبول ترین پروگرام ہے جسے ہر گھر میں بہت شوق سے دیکھا جاتا ہے، جب کہ اس پروگرام کے ویک اینڈ کی ریٹنگ سب سے ہائی ہوتی ہے کیونکہ ویک اینڈ کے دونوں دن سلمان خان اپنی چٹپٹی باتوں سے لوگوں کو محظوظ کرتے ہیں ،دوسری جانب شاہ رخ خان بھی کسی سے کم نہیں وہ اپنا شو ہٹ بنانے کیلئے ہمیشہ نئے آئیڈیاز لے کر آتے ہیں، اب دیکھنا یہ ہے کہ دونوں سپر اسٹارز میں سے کون ٹی وی پر اپنا سکہ جمانے میں کامیاب ہوتاہے۔