پولیس نے کراچی کے علاقے جمشید روڈ کے قریب ایک گھر پر چھاپا مار کر اسلحہ برآمد کرلیا تاہم ملزم فرار ہونے میں کامیاب ہوگیا۔
ایس ایس پی شرقی فیصل عبداللہ نے بتایا کہ گزشتہ رات گھریلو جھگڑے پر فائرنگ کے نتیجے میں 18 ماہ کا بچہ شدید زخمی ہوگیا جس کے بعد فائرنگ کرنے والے ملزم طارق کی اہلیہ نے پولیس کو واقعے سے مطلع کیا۔
ملزم کی گرفتاری کے لئے جب پولیس نے گھر پر چھاپا مارا تو گھر سے 2 پستول اور 4 ایس ایم جی رائفل برآمد ہوئی۔ ملزم کی اہلیہ نے پولیس کو بتایا کہ اس کا شوہر رات کو گھر سے جاتا ہے اور صبح واپس آتا ہے تاہم ا س کے کاروبار کے حوالے سے خاتون کوکچھ معلوم نہیں ۔ پولیس نے ملزم طارق کے خلاف مقدمہ درج کرکے گرفتاری کے لئے ٹیمیں تشکیل دی ہیں۔
