لاہور (جیوڈیسک) وزیر ریلوے خواجہ سعد رفیق کا کہنا ہے کہ کراچی میں امن و امان کی صورتحال میں بہت بہتری آئی ہے اس لیے شہر میں آپریشن بلا کسی خوف و خطر جاری رہے گا۔
لاہور میں میڈیا سے بات کرتے ہوئے وزیر ریلوے خواجہ سعد رفیق نے کہا کہ آپریشن ضرب عضب نے دہشت گردوں کی کمر توڑ دی ہے جس کے بعد دہشت گرد فرار کی راہیں تلا ش کررہے ہیں جب کہ کراچی میں بھی رینجرز کا آپریشن جاری ہے جس کے بعد شہر میں امن وامان کی صورتحال میں بہت بہتری آئی ہے اس لیے آپریشن بلا کسی خوف و خطرجاری رہے گا۔
خواجہ سعد رفیق کا کہنا تھا کہ چینی صدر کے حالیہ دورے میں 45ارب ڈالر کے منصوبوں پر دستخط کیے گئے ہیں، (ن) لیگ نے قوم سے جو وعدے کیے انہیں پورا کرنے کے لیے اپنی ساری کوششیں کررہے ہیں، توانائی بحران کو ختم کرنے کی کوشش پاکستان کو خوشحالی کے راستے پر لے جائے گی اور ہم حکومتی مدت ختم ہونے کے بعد چمکتی پیشانی کے ساتھ عوام کے پاس جائیں گے۔
انہوں نے کہا کہ ہم نے ریلوے سے سفارش اور لوٹ مار کے کلچر کو ختم کر کے بہت سے دوستوں کو ناخوش کیا ہے۔
وزیر ریلوے نے کہا کہ 25 اپریل کو ہونے والے کنٹونمنٹ بورڈ کے انتخابات میں مسلم لیگ(ن) کے امیداوار کامیاب ہوں گے جب کہ وزراء پر انتخابی مہم میں حصہ نہ لینے کی پابندی غیر آئینی ہے جس کے حوالے سے الیکشن کمیشن سے رابط کریں گے اگر ضرورت پڑی تو عدالت بھی جائیں گے۔
