Kangana Ranaut

ممبئی (جیوڈیسک) بالی ووڈ میں ان دنوں بائیو پک بنانے کا رحجان ہے جیسا کہ کرکٹر محمد اظہرالدین‘ مہندر سنگھ دھونی اور ریسلر مہاویر سنگھ فوگٹ کی زندگی پر فلمیں بنائی جا رہی ہیں اور اب بالی ووڈ کی ٹریجڈی کوئین مینا کماری پر بھی فلم بنانے کی تیاریاں کی جا رہی ہیں جس کےلیے بالی ووڈ کی ہونہار اداکارہ کنگنا رناوت کو مینا کماری کا کردار ادا کرنے کے لیے چنا گیا ہے۔

گزشتہ دنوں یہ بات سننے میں آئی تھی کہ تگمانشو ڈھولیا آنجہانی اداکارہ مینا کماری پر فلم بنانے کی منصوبہ بندی کر رہے ہیں۔ یہ بائیو پک ونود مہتا کی کتاب سے ماخوذ ہے اور اس کا نام ’’ مینا کماری: دی کلاسک بائیوگرافی ‘‘ ہے۔ اب سننے میں آیا ہے کہ اس فلم میں اداکارہ کنگنا رناوت مرکزی کردار ادا کریں گی۔ فلم ’’ کوئین ‘‘ کی اداکارہ کنگا رناوت اس سے پہلے ایک 80 سالہ اسٹار ملان لوتریا کی ’’ونس اپان اے ٹائم ان ممبئی ‘‘ میں بھی کام کر چکی ہیں۔

بالی ووڈ کی ’’ملکہ غم ‘‘ اپنی شراب نوشی کی عادت کی وجہ سے 39 سال کی عمر میں ہی انتقال کر گئی تھیں۔ اطلاعات ہیں کہ اس فلم پر کام کا آغاز اس سال کے آخر میں کیا جائے گا۔ دوسری طرف کنگنا رناوت نے گزشتہ روز فلم سٹی میں نکھل ایڈوانی کی نئی آنے والی فلم ’’کٹی بٹی ‘‘ کے لیے ایک اسپیشل نمبر کی شوٹنگ میں حصہ لیا اس موقع پر کنگنا نے سرخ اور سنہرا پٹیالہ سوٹ پہن رکھا تھا اور اس کی فلم ’’کٹی بٹی ‘‘ پہلی مرتبہ عمران خان کے ساتھ جوڑی بنی ہے۔

فلم کی عکسبندی کے اگلے حصے میں عمران خان اور دیگر آخری شوٹنگ کیلیے اگلے ماہ احمد آباد جائیں گے۔ 27 سالہ کنگنا رناوت اس فلم میں پائل کے نام سے ایک بوہمیان آرٹ اسٹوڈنٹ کا کردار ادا کر رہی ہیں۔ فلم کے لیے اس گانے کی 12 گھنٹے تک شوٹنگ جاری رہی اور عمران نے بھی مڈی شرما کے نام سے ایک انٹیریئر ڈیزائنر کے رول میں انٹری دی جب کہ اس کے لیے ایک 1970ء کے اسٹائل کا دہلی ہائوس بھی ممبئی میں بنایا گیا ہے۔