لاہور (نیوز ڈیسک )وزیراعظم عمران خان نے وفاقی کابینہ کے اجلاس میں زرتاج گل سے بہن کی نیکٹا میں تعیناتی کیلئے خط لکھنے پر سخت ناراضگی کا اظہار کیا اور انہیں بات کرنے سے رو ک دیا ۔نجی ٹی وی جیونیوز کے مطابق وزیراعظم عمران خان کی زیر صدارت وفاقی کابینہ کا اجلاس ہو اجس دوران وزیر مملکت برائے موسمیاتی تبدیلی زرتاج گل نے ہاتھ کھڑا کر کے بات کرنے کی کوشش کی تو عمران خان نے انہیں روک دیا اور مخاطب کرتے ہوئے کہا کہ آپ کو ایسا نہیں کرنا چاہیے تھا ، وزراءکو بتا رہاہوں کہ اختیارات کا ناجائز استعمال نہ کریں یہ پی ٹی آئی کا وژن نہیں ہے ، پارٹی کے وژن کے مطابق کام کریں ورنہ مجھ بہ جلد سخت فیصلے کرنے ہوں گے ۔کابینہ کے اجلاس میں وزیراعظم عمران خان نے وزارت توانائی کو عید کی چھٹیوں کے دوران لوڈشیڈنگ نہ کرنے کی ہدایت کر دی ہے جبکہ وفاقی کابینہ نے اضافی حج کوٹے سے چالیس فیصد نجی ٹورآپریٹرز کو دینے کی بھی منظوری دیدی ہے ۔وفاقی کابینہ کے اجلاس میں عتیق احمدکووفاقی تعلیمی بورڈکاسیکرٹری تعینات کرنے ، راجاجوادکوانسداددہشتگردی عدالت اسلام آبادکاجج مقررکرنے کی منظوری دیدی ہے ۔ خیال رہے کہ وزیراعظم عمران خان نے سفارشی خط لکھنے پر وزیرموسمیات زرتاج گل کی سرزنش کی ہے۔ وزیراعظم عمران خان نے ہدایت جاری کی ہے کہ کوئی بھی وزیر کسی سرکاری ملازم کی تقرری، ترقی یا تبادلے کے لیے کسی کو خط نہیں لکھے گا۔ذرائع کے مطابق وزیراعظم نے کہا ہے کہ کرپشن اور سفارش کلچر پر کوئی سمجھوتہ نہیں کیا گائے گا۔وزیراعظم نے زرتاج گل کی بہن شبنم گل کا تمام ریکارڈ بھی طلب کر لیا ہے اور ان کی بطور ڈائریکٹر نیکٹا تعیناتی کے حوالے سے بھی تمام ریکارڈ طلب کر لیا ہے۔ واضح رہے کہ وفاقی وزیرموسمیات زرتاج گل کی بہن شبنم گل جو کہ لاہور کالج فار ومن یونیورسٹی میں ایسوسی ایٹ پروفیسر تھیں انہیں نیکٹا میں انیسویں گریڈ کی ڈائریکٹر کی پوسٹ پر تعینایت کیا گیا تھا جس کے حوالے سے ایک خط سامنے آیا تھا ہ خط زرتاج گل کے پرنسپل سٹاف آفیسر سمیع الحق نے لکھا تھا، خط میں لکھا ہے کہ ’’مجھے آپ کو شبانہ گل کی نیکٹا میں تعیناتی کے حوالے سے آپ کی وزیرموسمیاتی تبدیلی زرتاج گل کے ساتھ ہونے والی ٹیلی فونک گفتگو کا حوالہ دینے کی ہدایت کی گئی ہے، مزید کارروائی کے لیےمس شبانہ کی سی وی اس خط کے ہمراہ ارسال کی جارہی ہے‘‘۔خط سامنے آنے کے بعدوزیراعظم عمران خان نے اس خط کا نوٹس لیتے ہوئے زرتاج گل کو وزارتِ داخلہ کے نام لکھا گیا خط واپس لینے کا حکم دے دیا اور شبنم گل کی بطور ڈائریکٹر نیکٹا تعیناتی کا نوٹیفکیشن بھی واپس لینے کا حکم دیا۔ دوسری جانب اختیارات سے تجاوز کرنے پروزیرماحولیات زرتاج گل کے خلاف قومی اسمبلی میں قرارداد جمع کروا دی گئی۔ قرارداد میں کہا گیا ہے کہ زرتاج گل نے اپنی بہن کو ڈائریکٹر بنوانے کے لیے وزارتِ داخلہ کو خط لکھا ان کے خلاف آرٹیکل 62کے تحت کارروائی کی جائے۔ قرار داد مسلم لیگ ن کی رکن پنجاب اسمبلی عظمیٰ بخاری نے جمع کروائی ہے۔