عمران خان کا دھرنا منسوخی کا فیصلہ شیخ رشید پر بجلی بن کر گرا، ساری رات نظر نہ آئے، صبح میڈیا کے سامنے آئے تو دل کا غم ہنسی میں اڑا دیا، لگتا ہے کپتان کو بھی احساس ہو گیا ہے، جب ہی تو انہوں نے شیخ رشید کو فون کرکے جلسے میں آنے کی دعوت دی ہے۔
راولپنڈی: عمران خان کے لال حویلی نہ آنے کی کسک شیخ رشید کے دل سے گئی نہیں۔ کبھی ذکر کرتے ہیں تو کبھی نظرانداز کر دیتے ہیں کہتے ہیں وہ نہیں آیا کوئی بات نہیں، عمران خان دوست ہے، بھائی ہے۔
شیخ رشید لاک ڈاؤن کے حامی رہے، دھرنا نہ ہوا تو اس کا دکھ ہنسی میں اڑا دیا۔ تاہم اب انہوں نے چاروناچار اپنی تمام تر امیدیں سپریم کورٹ سے وابستہ کر لی ہیں۔ دریں اثناء وہ لال حویلی سے کارکنوں کے ہمراہ کپتان کی دعوت پر پریڈ گراؤنڈ جلسے میں شمولیت کیلئے روانہ ہو گئے ہیں۔
اس سے قبل، شیخ رشید نے لال حویلی میں نیوز کانفرنس میں کہا کہ عوامی مسلم لیگ عمران خان کے 2 نومبر کے احتجاج کا حصہ ہے، عمران خان سے کہا تها کہ لال حویلی آئیں لیکن وہ نہیں آ سکے مگر میں آج تحریک انصاف کے جلسے میں شرکت کروں گا۔
انہوں نے کہا کہ عمران خان سادہ آدمی ہیں، لوگ ان سے چالاکی کرتے ہیں، نواز شریف کی کرپٹ حکومت کا خاتمہ چاہتے ہیں، عوامی مسلم لیگ اپنے ٹی او آرز دے گی، اثاثوں میں جھوٹ بولنے پر نواز شریف کو نااہل قرار دیا جائے۔
