نیویارک (ویب ڈیسک) ہالی ووڈ اداکارہ پامیلا اینڈرسن نے حال ہی میں پانچویں شادی کی اور شادی کے 12دن بعد ہی اپنے شوہر سے علیحدگی اختیار کر لی۔ ڈیلی سٹار کے مطابق پامیلا اینڈرسن نے گزشتہ روز ایک انٹرویو میں تصدیق کر دی ہے کہ وہ اپنے پانچویں شوہر جان پیٹرز سے شادی کے
بارہویں روز ہی علیحدہ ہو گئیں۔ اداکارہ کا کہنا تھا کہ ”ہم نے شادی تو کر لی تاہم ہمارے خیال میں ہمیں اب مزید وقت درکار ہے تاکہ ہم اپنے شادی کے فیصلے پر ازسرنو غور کر سکیں اور اپنے باہمی معاملات کو درست کر سکیں۔ “ہالی ووڈ رپورٹر سے بات کرتے ہوئے 52سالہ اداکارہ نے مزید کہا کہ ”میری اور جان کی شادی پر ہمیں لوگوں کی طرف سے بھرپور پذیرائی ملی۔ اب ہم علیحدہ ہو چکے ہیں تاکہ اپنے فیصلے پر مزید غور کر سکیں اور سوچ سکیں کہ ہم زندگی سے اور ایک دوسرے سے کیا چاہتے ہیں۔ میرے خیال میں زندگی ایک سفر ہے اور محبت ایک پراسیس۔ اس عالمگیر سچائی کو ذہن میں رکھتے ہوئے ہم نے باہم رضامندی سے اپنی شادی کی رجسٹریشن رکوا دی ہے اور فیصلہ وقت پر چھوڑ دیا ہے۔ میں لوگوں کا شکریہ ادا کرتی ہوں جنہوں نے ہماری پرائیویسی کا خیال رکھا۔“ واضح رہے کہ پامیلا اور جان 30سال قبل ایک دوسرے کے ساتھ تعلق میں رہے مگر پھر ان کی راہیں جدا ہو گئیں۔ اس کے بعد دونوں نے شادیاں کیں اور اس عمر میں آ کر ان کی محبت ایک بار پھر جوش میں آئی اور انہوں نے شادی کر لی مگر اس بار بھی محبت کا جوش 12دن میں ہی ٹھنڈا پڑ گیا۔
