لاہور: چیئرمین تحریک انصاف عمران خان نے اپنی نشست این اے 131 چھوڑنے کا باضابطہ اعلان نہیں کیا اور ہمایوں اختر نے پہلے ہی بطور امیدوار سٹکرز چھپوا کر مہم شروع کردی ہے۔ سٹکرز پر حلقہ این اے 131 اور انتخابی نشان بلا کے ساتھ ہمایوں اختر کا نام تحریر ہے۔

این اے 131 میں الید اقبال بھی ٹکٹ ملنے کے امیدوار ہیں تاہم عمران خان نے تاحال کسی کو این اے 131 کے ضمنی الیکشن کے لئے امیدوار نامزد نہیں کیا۔ ولید اقبال کا دعویٰ ہے کہ عمران خان نے انہیں اس حلقے کے لئے بطور امیدوار نامزد کرنے کا وعدہ کررکھا ہے جبکہ ذرائع کا دعویٰ ہے کہ ہمایوں اختر نے تحریک انصاف میں شمولیت ہی عمران خان کے اس وعدے پر کی تھی کہ انہیں این اے 131 کے ضمنی الیکشن میں تحریک انصاف کا امیدوار نامزد کیا جائے گا۔ ہمایوں اختر نے عمران خان کی بھرپور انتخابی مہم اسی مقصد کے لئے چلائی تھی۔

ذرائع کا یہ بھی دعویٰ ہے کہ ہمایوں اختر کی چونکہ مالی حالت نسبتاً زیادہ بہتر ہے اور ضمنی الیکشن میں بھرپور خرچہ کرنے کی پوزیشن میں ہیں اس لئے ہمایوں اختر کو این اے 131 کے ضمنی الیکشن میں بطور امیدوار نامزد کئے جانے کا زیادہ امکان ہے۔