کراچی: کراچی کے علاقے لیاقت آباد ایف سی ایریا میں نامعلوم افراد کی جانب سے دستی بم حملے میں ایک بچہ جاں بحق ہو گیا۔ واقعہ میں بیس افراد زخمی ہو گئے جن میں 3 بچے اور 4 خواتین بھی شامل ہیں۔ واقعے کی اطلاع ملتے ہی قانون نافذ کرنے والے اداروں کے اہلکار اور امدادی ٹیمیں موقع پر پہنچ گئیں اور ایمبیولینسوں کے ذریعے زخمیوں کو عباسی شہید ہسپتال منتقل کیا گیا جہاں انھیں طبی امداد دی جا رہی ہے۔ ہسپتال ذرائع کے مطابق 3 زخمیوں کی حالت تشویشناک ہے۔ دوسری جانب پولیس کا کہنا ہے کہ نامعلوم افراد دستی بم پھینک کر فرار ہونے میں کامیاب ہو گئے۔ پولیس نے واقعے کی تحقیقات شروع کر دی ہے۔ حملے کے بعد شہر بھر کی سیکیورٹی کو سخت کر دیا گیا ہے۔ وزیراعلیٰ سندھ سید مراد علی شاہ نے واقعے کی شدید الفاظ میں مذمت کرتے ہوئے مجرموں کیخلاف فوری ایکشن لینے کے احکامات جاری کئے ہیں۔