اسلام آباد(ایس ایم حسنین) ووہان لیبارٹری کے پاکستان میں مبینہ خفیہ آپریشنز کی خبروں کو بے بنیاد اور جعلی قرار دیتے ہوئے دفتر خارجہ نے واضح کیا ہے کہ اس بارے میں خبر جعلی اور سیاسی مفادات کے زیراثر ہے۔ ترجمان دفتر خارجہ عائشہ فاروقی نے مبینہ خفیہ آپریشنز کے بارے میں خبر سے متعلق میڈیا کے سوال پر بیان جاری کرتے ہوئے کہا ہے کہ یہ جعلی خبر سیاسی وجوہات کے زیراثر جاری کی گئی ہے جس میں حقائق توڑ مروڑ کر پیش کرنے کے علاوہ نامعلوم خفیہ ذرائع کو استعمال کرکے من گھڑت رنگ دیاگیا ہے۔ پاکستان کی بائیوسیفٹی لیول تھری (بی۔ایس۔ایل۔تھری) لیبارٹری کے بارے میں کچھ بھی خفیہ نہیں جیسا کہ اس خبر میں حوالہ دیاگیا۔ پاکستان اعتماد سازی کے اقدامات کے تحت اس سے متعلق تمام معلومات حیاتیاتی اور زہریلے ہتھیاروں کے کنونشن (بی۔ٹی۔ڈبلیو۔سی) کے تحت فراہم کرتا رہا ہے۔ اس ادارے کا مقصد تحقیق وترقی سے حفاظتی نظام اور تشخیص میں بہتری ہے تاکہ سامنے آنے والے صحت کے خطرات، نگرانی اور وبائی امراض کے پھیلاو کی جانچ ممکن ہوسکے۔ بیان میں کہا گیا ہے کہ پاکستان ’بی۔ٹی۔ڈبلیو۔سی‘کے تحت ذمہ داریوں پر سختی سے کاربند ہے اور کنونشن کی توثیق کنندہ ریاستوں کی طرف سے عمل درآمد کو یقینی بنانے کے طریقہ کار کے سختی سے نفاذ کا ہمیشہ سے پرزور حامی رہا ہے۔ انھوں نے واضح کیا کہ اس ادارے کے بارے میں بہتان تراشی مضحکہ خیز اور بالخصوص کورونا وبا کے تناظر میں افسوسناک ہے جس نے امراض کی نگرانی کنٹرول، بہتر تیاری اور عالمی اشتراک عمل کی اہمیت بڑھادی ہے جو ’بی۔ٹی۔ڈبلیو۔سی‘ کے آرٹیکل دس کے مطابق ہے۔