اعوان والا کا عامر نجمہ کو پسند کرتا تھا ، مہندی کی رات دلہن کو گھر کے سامنے والے پلاٹ میں گولی مار کر خودکشی کر لی
فیصل آباد (یس اُردو) فیصل آباد میں شادی والا گھر ماتم کدہ بن گیا ، لڑکے نے رخصتی سے پہلے لڑکی کو قتل کرکے خودکشی کرلی ۔ والدین پر قیامت ٹوٹ پڑی ۔ افسوسناک واقعہ فیصل آباد کے علاقے اعوان والا میں پیش آیا جہاں شہنائیوں والے گھر میں صف ماتم بچھ گئی ۔ اعوان والا کی 20 سالہ نجمہ کی آج شادی تھی اور اسی گاؤں کا 25 سالہ لڑکا محمد عامر نجمہ کو پسند کرتا تھا لیکن وہ شادی شدہ اور دو بچوں کا باپ تھا ۔ عامر نے مہندی کی رات گھر کے سامنے خالی پلاٹ میں لے جا کر گولی مار کر نجمہ کی جان ہی لے لی اور اس کے بعد خودکشی بھی کرلی ۔ گھر والوں کے تلاش کرنے پر دونوں کی لاشیں قریبی مدرسے کی دیوار کے ساتھ پڑی مل گئیں ۔ لاشوں کے پاس پستول بھی برآمد ہوا ۔ شادی والے گھر میں لڑکی کی موت کی خبر پہنچی تو والدین پر قیامت ٹوٹ پڑی ۔ لڑکی کے گھر والوں کا کہنا ہے کہ دونوں ایک دوسرے کو پسند کرتے تھے لیکن لڑکا شادی شدہ ہونے کی وجہ سے رشتہ دینے سے انکار کیا تھا ۔ دردناک واقعے پر علاقے کی فضا سوگوار ہوگئی ۔ پولیس نے لاشیں قبضے میں لے کر پوسٹ مارٹم کیلئے الائیڈ ہسپتال منتقل کردی ہیں جبکہ پولیس نے قتل اور خودکشی کا مقدمہ درج کر لیا ہے ۔
