ٹوبہ ٹیک سنگھ میں کرسمس کے موقع پر زہریلی شراب پینے سے مرنے والوں میں مزید 8کا اضافہ ہوگیا ہے جس کے بعدہلاکتیں30 تک پہنچ گئی ہیں۔
پولیس کے مطابقکرسمس کے موقع پر کرسچین کالونی کے محلہ مبارک آباد میں زہریلی شراب پینے سے 50سے زائد افراد کی حالت غیر ہوگئی ، ہلاکتوں میں مسلسل اضافے کے بعد ڈی ایچ کیو ٹوبہ ٹیک سنگھ اور الائیڈ اسپتال فیصل آباد میں اب بھی درجنوں افراد زیرعلاج ہیں۔ذرائع کے مطابق آج مزید 4افراد الائیڈ اسپتال میں دم توڑگئے جس کے بعد اسپتال میں مرنے والوں کی تعداد13سے تجاوز کرگئی ہےجبکہ زیرعلاج افراد میں 5 کی حالت تشویشناک ہے۔واقعے کی انکوائری کے لیے ڈی ایس پی عاطف عمران کی قیادت میں ٹیم تشکیل دے دی گئی ہے۔ تحقیقاتی ٹیم نے ہلاکتوں کا مقدمہ درج کرنے کے بعد اب تک4 افراد کو حراست میں لیا، جن سے تفتیش کی جارہی ہے۔ پولیس زیرحراست افراد کی تفصیلات بتانے سے گریز کر رہی ہے۔
