Imran Khan And Bill Gates

پشاور (جیوڈیسک) مائیکرو سافٹ کے بانی بل گیٹس نے تحریک انصاف کے چیرمین عمران خان کو صوبہ خیبر پختونخوا میں صحت کے منصوبوں کی نگرانی کے لئے جدید سیٹلائٹ سسٹم فراہم کرنے کی پیشکش کی ہے۔

بل گیٹس کی جانب سے عمران خان کو لکھے گئے خط میں صوبہ خیبر پختونخوا میں پولیو سمیت دیگر بیماریوں کے خاتمے کے لئے عمران خان کی کوششوں کی تعریف کرتے ہوئے کہا گیا ہے کہ پولیو کے خلاف آپ کا عزم دیکھ کر ہماری حوصلہ افزائی ہوئی اور اس سے ظاہر ہوتا ہے کہ پولیو کا خاتمہ انسانیت کے لئے کتنی بڑی ترجیح ہے۔

انہوں نے کہا کہ یہ بات خوش آئند ہے کہ وفاقی، صوبائی حکومتیں اور مسلح افواج ’’صحت کا اتحاد‘‘ پروگرام کے تحت کام کر رہے ہیں جس میں مزید بہتری کے لئے خیبر پختونخوا میں صحت کے منصوبوں کی موثر نگرانی کے لئے جدید ترین سیٹلائٹ ٹیکنالوجی فراہم کرنا چاہتے ہیں جو نائجیریا میں بھی پولیو کے خاتمے کے لئے کامیابی سے استعمال کی جاچکی ہے اور اس کی مدد سے ڈاکٹرز، اسپتالوں کی بروقت اور موثر نگرانی ہوسکتی ہے۔

بل گیٹس نے خط میں عمران خان کو مخاطب کرتے ہوئے مزید کہا کہ آپ کی براہ راست نگرانی پاکستان سے پولیو کے خاتمے کے لئے ضروری ہے، آپ کی چیف سیکریٹری اور صوبائی وزیر اعلیٰ پرویز خٹک سے بات چیت پولیو کے خاتمے کی مہم چلانے میں مددگار ثابت ہوگی اور اس حوالے سے آپ سے بات کرنے کے لئے ڈاکٹر وقار اجمل کو ذمہ داری سونپی گئی ہے