لاہور(ویب ڈیسک) سابق بھارتی بیٹسمین سنجے منجریکر نے بھارت کو ایشیا کپ کی اہم ٹیم قراردیاہے تاہم ان کا کہنا ہے کہ پاکستان ایونٹ کی فیورٹ ٹیم ہے کیونکہ وہ متحدہ عرب امارات میں تسلسل کے ساتھ کرکٹ کھیل رہی ہے۔۔پاکستان ایشیا کپ کے اپنی مہم کا آغاز ہانگ کانگکو آٹھ وکٹوں سے شکست دے کرکرچکا ہے جب کہ روہت شرما کی قیادت میں بھارتی ٹیم منگل کو ہانگ کانگ کے خلاف میچ سے مہم شروع کرے گی۔ گروپ ”اے“ میں سب سے بڑا معرکہ پاکستان اور بھارت کے درمیان 19 ستمبر کو ہوگا۔سنجے منجریکر کا کہنا ہے کہ میرے خیال میں پاکستان نے بھارت سے زیادہ فیورٹ کی طرح شروعات کی ہیں۔سابق بھارتی بیٹسمین کا کہنا ہے کہ بھارت نے ویرات کوہلی کو آرام کرایا ہے، جس کی وجہ ٹیم کی مضبوطی کافی کم ہوگئی ہے۔ سنجے منجریکر کا مزید کہنا ہے کہ ظاہر ہے بھارت مقابلے میں شریک ہے لیکن جب آپ فیورٹ کی بات کرتے ہیں تو سوال اٹھتا ہے کہ کونسی ٹیم کو مضبوط ترین قرار دیا جائے تو وہ پاکستان ہے۔37 ٹیسٹ اور 74 ایک روزہ بین الاقوامی میچوں میں بھارت کی نمائندگی کرنے والے سنجے منجریکر نے کہا کہ رسٹ سپن کی جوڑی یوزویندرا چاہل اور کلدیپ یادیو نے بھارتی ٹیم کو مزید متوازن بنادیا ہے۔ان کا کہنا تھا کہ بھارتی ٹیم ملک سے باہر ٹیسٹ میچوں میں کچھ جدوجہد کررہی ہے لیکن اگر آپ 50 اوورز کی کرکٹ کی بات کریں تو یہ تمام کنڈیشنز میں بہترین ٹیم ہے۔پہلے بیٹنگ بھارتی ٹیم کی طاقت تھی لیکن باﺅلنگ زیادہ اچھی نہیں تھی لیکن
اب چاہل اور کلدیپ کے آنے سے ٹیم زیادہ میچز جیت رہی ہے۔یاد رہے کہ بھارتی کرکٹ بورڈ نے سٹار بلے باز ویرات کوہلی کو ایشیاءکپ کے لیے آرام دینے کا فیصلہ کیا تھا جس پر ایشین کرکٹ کونسل نے بھرپور تنقید کی تھی ۔دوسری جانب ایک خبر کے مطابق سابق کرکٹرز نے ایشیا کپ ٹور نامنٹ میں پاک بھارت ٹاکرے سے قبل سابق کھلاڑیوں نے ٹیم کو مشورہ دیا ہے کہ ویرات کوہلی کے نہ ہونے سے پاکستان کو نہیں بھارت کو فرق پڑیگا ،ْ پاکستان کو اپنی حکمت عملی کے ساتھ کھیلنا چاہیے ،ْپاکستان کو کنڈیشنز کی وجہ سے فائدہ ہوگا ،ْبھارت کی بیٹنگ لائن اپ اچھی ہے اور دونوں ٹیموں کے درمیان تگڑا مقابلہ ہوگا ۔ ایک انٹرویومیں قومی ٹیم کے سابق کپتان اور چیف سلیکٹر انضمام الحق نے کہا کہ بھارت کے خلاف کہیں بھی مقابلہ ہو وہ زبردست ہوتا ہے، دبئی میں ایک دوسرے کو کھیلتا ہوا دیکھ کر مزہ آئے گا۔انضمام الحق نے کہا کہ ویرات کوہلی کے نہ ہونے سے پاکستان کو نہیں بھارت کو فرق پڑے گا اس لیے ویرات کوہلی بھارت کا معاملہ ہے اور پاکستان کو اپنی حکمت عملی کے ساتھ کھیلنا چاہیے۔ سابق فاسٹ بولر شعیب اختر کا پاک بھارت ٹاکرے سے متعلق کہنا ہے کہ پاکستان کو کنڈیشنز کی وجہ سے فائدہ ہوگا، متحدہ عرب امارات اب پاکستان کا ہوم گراؤنڈ بن چکا ہے۔شعیب اختر نے کہا کہ چیمپیئنز ٹرافی کے فائنل کی شکست کا بھارت پر خوف ہوگا اور گرین شرٹس کو بھارتی سورماؤں پر نفسیاتی برتری حاصل ہوگی۔شعیب اختر کا کہنا تھا کہ بھارت کی بیٹنگ لائن اپ اچھی ہے اور دونوں ٹیموں کے درمیان تگڑا مقابلہ ہوگا تاہم ویرات کوہلی کا آرام کرنا سمجھ سے باہر ہے۔یاد رہے کہ گروپ اے میں شامل پاکستان اور بھارت کے درمیان کل دبئی انٹرنیشنل اسٹیڈیم میں ٹاکرا ہوگا جس کیلئے شائقین کرکٹ بے تاب ہیں۔گروپ بی میں شامل سری لنکن ٹیم ایونٹ سے باہر ہوگئی جب کہ بنگلادیش اور افغانستان کی ٹیمیں سپر فور تک پہنچ گئیں۔