لاہور (ویب ڈیسک) نجی ٹی وی چینل کے پروگرام میں بات کرتے ہوئے سینئیر صحافی عارف حمید بھٹی نے دعویٰ کیا ہے کہ احتساب عدالت کے جج ارشد ملک کی ویڈیو کے بعد مزید ویڈیو آنے کے لیے تیار ہیں۔ انہوں نے کہا کہ بہتر یہی تھا کہ اگر ایسی کوئی ویڈیو تھی تو اسے عدلیہ کے سامنے لے جایا جاتا بجائے اس کے کہ اُسے میڈیا کے سامنے لا کر اور پریس کانفرنس کر کے عدلیہ کو رسوا کرنے کی سازش کی جاتی۔کل رات بھی مسلم لیگ ن کے میڈیا سیل اور پرویز رشید سمیت کئی لوگوں نے ایک اور نئی کیسٹ کے بارے میں تیاری کر لی ہے اور ان کا خیال ہے کہ اب جو بھی نئی کیسٹ آئے گی اسے سوشل میڈیا کے ذریعے وائرل کروایا جائے گا۔ اور اُس میں بعض ایک سابق جج اور کچھ اہم ادارے کے لوگ بھی ہو سکتے ہیں۔انہوں نے مزید کہا کہ ایسی غیراخلاقی ویڈیوز کو میڈیا پر لانے کی بجائے عدالتوں کے سامنے پیش کیا جانا چاہئیے اور عدالتوں کو بھی چاہئیے کہ وہ اس کے ذمہ داران کو سزا دیں بصورت دیگر عدالتی نظام پر بھی سوالات اُٹھیں گے جبکہ حکومت کی تو کوئی ساکھ بچی ہی نہیں لہٰذا حکومت سے کوئی توقع نہیں کی جا سکتی۔خیال رہے کہ گذشتہ ہفتے مسلم لیگ ن کی نائب صدر مریم نواز نے ایک پریس کانفرنس میں احتساب عدالت کے جج ارشد ملک کی ایک ویڈیو میڈیا کے حوالے کی تھی اور اُن پر نواز شریف کے خلاف دباؤ کے تحت فیصلے کرنے کا الزام عائد کیا تھا۔ اس ویڈیو پر کافی بحث اور تبصرے بھی ہوئے جس کے بعد گذشتہ روز احتساب عدالت کے جج ارشد کو عہدے سے ہٹانے کا فیصلہ کیا گیا تھا۔ترجمان اسلام آباد ہائیکورٹ کی جانب سے جاری بیان میں کہا گیا کہ احتساب عدالت کت جج ارشد ملک کو عہدے سے ہٹا دیا گیا ہے۔ جج ارشد ملک کی خدمات واپس کرنے کے لیے اسلام آباد ہائیکورٹ نے وزارت قانون کو خط لکھ دیا ہے۔قائم مقام چیف جسٹس نے خط میں کہا ہے کہ وزرات قانون جج ارشد ملک کی خدمات واپس لے۔ جبکہ دوسری جانب سپریم کورٹ آف پاکستان نے احتساب عدالت کے جج ارشد ملک کا ویڈیو اسکینڈل سماعت کے لیے بھی مقرر کر لیا تھا ۔ چیف جسٹس آف پاکستان جسٹس آصف سعید کھوسہ کی سربراہی 3 رکنی بنچ 16 جولائی کو اس کیس کی سماعت کرے گا۔