فرانس کے جنوب مشرقی محکموں میں موسلا دھار بارشوں کے نتیجے میں آنے والے سیلاب نے معمولات زندگی کو شدید متاثر کیا ہے۔ گارڈ اور ایرو میں گزشتہ رات سے جاری بارشوں کے باعث اے نائن موٹروے کا ایک حصہ دونوں اطراف سے ٹریفک کے لیے بند کر دیا گیا ہے۔
اے نائن موٹروے پر ٹریفک معطل
فرانسیسی ذرائع ابلاغ کے مطابق گارڈ محکمے میں نیم سے گالارگ ایگ تک تقریباً دس کلومیٹر طویل موٹروے روڈ پر سیلابی پانی جمع ہو گیا ہے۔ اس وجہ سے دونوں سمتوں میں ٹریفک مکمل طور پر معطل ہے۔ حکام نے مسافروں کو متبادل راستے اختیار کرنے کی ہدایت کی ہے اور غیر ضروری سفر سے گریز کی اپیل کی ہے۔
لونیل میں سیلابی ریلے اور شہریوں کے لیے انتباہ
ایرو محکمے کے شہر لونیل میں متعدد سڑکیں اب بھی پانی میں ڈوبی ہوئی ہیں۔ شہریوں کے موبائل فون پر ایمرجنسی الرٹ بھیج کر انہیں محفوظ مقامات پر رہنے کی تلقین کی گئی۔ بلدیاتی انتظامیہ کے مطابق گزشتہ رات کل سولہ افراد کو شہر کے ایک ہال میں پناہ دی گئی۔
چار محکمے اورنج الرٹ کی زد میں
محکمہ موسمیات نے بتایا ہے کہ اس وقت چار محکمے اورنج الرٹ کی زد میں ہیں۔ کورسیکا جنوبی اور بالائی کورسیکا میں سیلاب کے خطرے کے پیش نظر، وار میں شدید بارش، سیلاب اور طوفانی گرج چمک کے باعث، جبکہ گارڈ میں دریاؤں میں طغیانی کے خطرے کے سبب اورنج الرٹ جاری ہے۔
واضح رہے کہ آرڈیش، ووکلوز اور بوش دی رون محکموں میں اورنج الرٹ مقررہ وقت سے پہلے ہی واپس لے لیا گیا تھا۔
متاثرہ علاقوں میں امدادی کارروائیاں جاری
گارڈ محکمے کے علاقوں سین لوران دیگوز، ایمارگ، ووور اور ایگ مورٹ سمیت متعدد قصبوں میں بھی شدید سیلاب کی اطلاعات ہیں۔ حکام نے شہریوں کو ہدایت کی ہے کہ وہ سیلابی سڑکوں پر گاڑی نہ چلائیں، دریاؤں اور ندی نالوں سے دور رہیں اور زیر زمین پارکنگ اور گزروں میں نہ اتریں۔ ریسکیو ٹیمیں متاثرہ علاقوں میں تعینات کر دی گئی ہیں اور صورتحال پر مسلسل نظر رکھی جا رہی ہے۔
