شمالی وزیرستان میں انٹیلیجنس بیسڈ آپریشن
سیکیورٹی ذرائع کے مطابق خیبر پختونخوا اور بلوچستان میں الگ الگ کارروائیوں کے دوران سیکیورٹی فورسز نے 18 دہشت گردوں کو ہلاک کر دیا۔ شمالی وزیرستان میں عزمِ استحکام کے تحت انٹیلیجنس بیسڈ آپریشن کیا گیا جس میں 13 دہشت گرد مارے گئے۔
ذرائع کا کہنا ہے کہ کارروائی سے قبل فورسز دہشت گردوں کی نقل و حرکت کی مسلسل نگرانی کر رہی تھیں۔ اس کے بعد شمالی وزیرستان اور گرد و نواح میں دہشت گردوں کے ٹھکانوں کو نشانہ بنایا گیا۔
مستونگ میں آپریشن ردُ الفتنہ 3
بلوچستان میں سیکیورٹی فورسز نے آپریشن ردُ الفتنہ 3 کے تحت کارروائی کی۔ سیکیورٹی ذرائع کے مطابق مستونگ کے علاقوں سیاپست اور کلی گشتاری میں پانچ دہشت گرد ہلاک ہوئے۔
کارروائی کے دوران ہلاک دہشت گردوں سے بھاری مقدار میں اسلحہ اور گولہ بارود بھی برآمد ہوا۔
سرچ اینڈ کلیئرنس آپریشنز جاری
متاثرہ علاقوں میں کسی بھی باقی ماندہ دہشت گرد کی موجودگی کا پتہ لگانے کے لیے سرچ اینڈ کلیئرنس آپریشنز جاری ہیں۔ سیکیورٹی فورسز کا کہنا ہے کہ دہشت گردی کے خطرے کے مکمل خاتمے تک کارروائیاں جاری رہیں گی۔
گزشتہ روز بھی کارروائی ہوئی تھی
واضح رہے کہ ایک روز قبل شمالی وزیرستان میں سیکیورٹی آپریشن کے دوران پانچ دہشت گرد ہلاک اور دو زخمی ہوئے تھے۔ ذرائع کے مطابق یہ آپریشن علاقے میں دہشت گردوں کی سرگرمیوں کی نشاندہی کے بعد کیا گیا۔ اس کے بعد فورسز نے شمالی وزیرستان اور ملحقہ علاقوں میں مشتبہ دہشت گردوں کے ٹھکانوں کے خلاف کارروائی کی۔
