سیکیورٹی ذرائع کے مطابق خیبر پختونخوا اور بلوچستان میں انٹیلی جنس معلومات کی بنیاد پر کی گئی الگ الگ کارروائیوں میں سات دہشت گرد مارے گئے۔ ان کارروائیوں کے دوران بھاری مقدار میں اسلحہ اور گولہ بارود بھی قبضے میں لیا گیا جبکہ دہشت گردوں کے ٹھکانے تباہ کر دیے گئے۔
خیبر پختونخوا میں کارروائی
سیکیورٹی ذرائع نے بتایا کہ خیبر پختونخوا کے علاقے بڑہ میں انٹیلی جنس معلومات پر کارروائی کی گئی۔ اس دوران “فتنہ الہندستان” سے وابستہ پانچ دہشت گرد ہلاک ہوئے۔ آپریشن میں دہشت گردوں کے ٹھکانے تباہ کیے گئے اور ان کے قبضے سے اسلحہ و گولہ بارود برآمد کیا گیا۔
بلوچستان میں آپریشن ردالفِتنہ 3
بلوچستان کے ضلع چاغی کے علاقے نوکچہ میں آپریشن ردالفِتنہ 3 کے تحت کارروائی ہوئی۔ ذرائع کے مطابق اس کارروائی میں دو دہشت گرد ہلاک ہوئے۔ دہشت گردوں نے نوکچہ میں ایک خالی واٹر باؤزر کو آگ لگا کر فرار ہونے کی کوشش کی تاہم سیکیورٹی فورسز نے فوری جوابی کارروائی کرتے ہوئے دونوں کو ہلاک کر دیا۔
ذرائع کا کہنا ہے کہ یہ دہشت گرد این-40 ہائی وے پر متعدد مقامات پر آتش زنی کے واقعات میں ملوث تھے۔
اگست میں بھی کارروائی
سیکیورٹی ذرائع کے مطابق 31 اگست کو بھی اسی نوعیت کی تخریب کاری کی کوششوں میں ملوث گیارہ دہشت گردوں کو ہلاک کیا گیا تھا۔
کارروائیاں جاری رہیں گی
سیکیورٹی فورسز نے واضح کیا ہے کہ ملک سے دہشت گردی کے خاتمے اور دیرپا امن کے قیام کے لیے دہشت گردوں کے خلاف کارروائیاں جاری رکھی جائیں گی۔
