سابق صدرآصف زرداری اورمحترمہ فریال تالپورکی گرفتاری سے جیالوں کو جھکایا نہیں جا سکتا، قاری فاروق احمد فاروقی
پیرس/اسلام آباد(ایس ایم حسنین) پاکستان پیپلز پارٹی فرانس کے سینئر راہنما قاری فاروق احمد فاروقی نےسابق صدر آصف زرداری کی گرفتاری کی شدید مذمت کرتے ہوئے اسے ریاستی دہشت گردی قرار دیا۔انہوں نے کہا کہ پیپلز پارٹی پہلے کبھی گرفتاریوں سے گھبرائی نہ اب گھبرائے گی جیالوں نے ہمیشہ جرات اور بہادری کی تاریخ رقم کی ۔ پیپلز پارٹی کو ختم کرنے والے خود فنا ہوگئے۔ انہوں نے کہا کہ ملک میں بڑے بڑے آمر آئے چلے گئے مگر پیپلز پارٹی کو عوام کے دلوں سے نہیں نکالا جاسکا۔ پیپلز پارٹی نے عوام کو سیاسی شعور دیا۔ پارٹی کے بانی اور دختر مشرق بے نظیر بھٹو عوام کے حقوق کیلئے قربان ہوگئیں مگر آمروں سے کبھی سمجھوتہ نہیں کیا۔ پیپلز پارٹی وفاق کی علامت ہے جو چاروں صوبوں‘ گلگت‘ بلتستان اور آزاد کشمیر میں عوام کے حقوق کے لئے سرگرم عمل ہے۔ پیپلز پارٹی کی سیاسی جدوجہد ہمیشہ عوام کی فلاح و بہبود کے حصول کیلئے رہی اور رہے گی آصف زرداری پر پہلے بھی مقدمات بنائے گئے جو جھوٹے ثابت ہوئے انشاء اللہ جعلی اکائونٹس کے مقدمے میں بھی عدالتوں سے وہ سرخرو ہوکر جلد عوام کے درمیان ہونگے۔
