ٹوکیو: گاڑی نہ صرف ڈرائیور کے جذبات کو سمجھ سکتی ہے بلکہ وائس کمانڈ ملنے سے متعدد اہم کام بھی انجام دے سکتی ہے :ماہرین
ہونڈا نے اپنی ایک اور کانسیپٹ گاڑی اربن سپورٹس ای متعارف کرائی ہے جس نے دیکھنے والوں کو بہت زیادہ متاثر کیا ہے ۔ ٹوکیو موٹر شو کے دوران رکھی جانے والی یہ گاڑی گزشتہ ماہ فرینکفرٹ موٹر شو میں متعارف کرائے جانے والے اربن ای وی کانسیپٹ گاڑی کا سپورٹس ورژن ہے۔
اربن ای وی کانسیپٹ درحقیقت ہونڈا کی 1970 کی دہائی کی ہیچ بیک گاڑیوں کی یاد دلاتی ہے مگر یہ نیا ورژن اس سے بھی پہلے کے یعنی ساٹھ کی دہائی کے ماڈلز یاد کرتا ہے۔ سپورٹس باڈی والی اس گاڑی میں بیشتر ٹیکنالوجی تو اربن ای وی والے ہی ہیں جو کہ 2019 میں فروخت کے لیے پیش کیے جانے کا اعلان ہوچکا ہے۔ تاہم اس سپورٹس گاڑی میں آرٹی فیشل ٹیکنالوجی کو بھی شامل کیا گیا ہے اور کمپنی کا کہنا ہے کہ وہ مستقبل کے ماڈلز میں اس ٹیکنالوجی کو شامل کرنے کی خواہشمند ہے۔
کمپنی کے مطابق ہمارا مقصد ڈرائیور کو سفر سے لطف اندوز ہونے کا موقع دینا ہے ۔ یہ گاڑی ڈرائیورز کے ردعمل اور جذبات کو مانیٹر کرسکتی ہے جبکہ وائس کمانڈ سے متعدد کام سرانجام دے سکتی ہے ۔ اگرچہ اربن ای وی تو چند برسوں میں دستیاب ہوگی مگر کمپنی اس کے سپورٹس ورژن کی کمرشل تیاری کی خواہشمند نہیں۔
تاہم کمپنی اس پر مزید تجربات کرنے کا ارادہ ضرور رکھتی ہے تاکہ مستقبل میں ایسی گاڑیوں کی تیاری میں مدد مل سکے۔ ہونڈا کے خیال میں مستقبل قریب میں انسان اپنی گاڑیوں سے بات چیت کرسکیں گے، کم از کم اس کانسیپٹ گاڑی کی حد تک تو کچھ ایسا ہی نظر آتا ہے۔
