پریانکا کو18سال کی عمرمیں کس تکلیف سےگزرناپڑاتھا؟
ممبئی: نامور بالی ووڈ اداکارہ پریانکا چوپڑا نے ماضی میں اپنے ساتھ پیش آئے ایک تکلیف دہ واقعے کے بارے میں بتاتے ہوئےکہا ہے کہ 18 سال کی عمر میں انہیں اس حد تک ذہنی دباؤ میں مبتلا کیا گیا تھا کہ ان کا صبر جواب دے گیا تھا،تاہم اس واقعے نے ایک نئی پریانکا کو جنم دیا۔بالی ووڈ فلمیں کہانی، ایکشن، موسیقی اور ہیروئنوں کے بغیر نامکمل ہیں ، بھارتی فلم انڈسٹری میں آج تک کسی نے بھی ایسی فلم بنانے کی کوشش نہیں کی جو ہیروئن کے بغیر ہو، اداکارائیں بالی ووڈ کا اہم اور لازمی جز سمجھی جاتی ہیں اور بیشتر شائقین اداکاراؤں کو دیکھنے کے لیے ہی سینما کا رخ کرتے ہیں ۔ تاہم فلموں کا لازمی جز سمجھی جانے والی ہیروئنوں کو آج بھی بالی ووڈ میں قدر کی نگاہ سے نہیں دیکھا جاتا ، ان کے ساتھ نہ صرف صنفی امتیاز برتا جاتا ہے بلکہ انہیں معاوضہ بھی فلم کے ہیرو کے مقابلے میں کم دیاجاتا ہے۔
اس خبرکوبھی پڑھیں: سکم کو بغاوت سے متاثر کہنے پر پریانکا چوپڑا پر تنقید
پریانکا نےایک انٹرویو کےدوران ماضی کے واقعات سے پردہ اٹھاتے ہوئے کہا کہ جب میں 18 سال کی تھی تو بالی ووڈ سے تعلق رکھنے والے ہدایت کار(پریانکا نے ہدایت کار کانام نہیں بتایا)نے مجھے صاف لفظوں میں کہا کہ اگر میں کم معاوضے اور ہدایت کار کی شرطوں کے مطابق کام نہیں کروں گی تو وہ مجھے فلم سے نکال کر کسی اور کو یہ فلم دے دیں گے،کیونکہ انٹرٹینمنٹ بزنس میں ہیرو کے مقابلے میں ہیروئن کو تبدیل کرناکوئی بڑی بات نہیں ۔ پریانکا یہ واقعہ شیئر کرتے وقت جذباتی ہوگئیں اور کہا کہ میں آج تک یہ سب بھلا نہیں سکی ہوں ۔ تاہم اس واقعے نے میری ہمت توڑی نہیں بلکہ مجھے مزید مضبوط بنایا اور میں نے فیصلہ کیا کہ میں خود کواس قابل بناؤں گی کہ کوئی فلمساز مجھے نکالنے کے متعلق سوچے بھی نہیں۔
اس خبرکوبھی پڑھیں: پریانکا چوپڑا کب شادی کررہی ہیں، والدہ نے بتا دیا
پریانکا نے اپنا کہا سچ کردکھایا، آج ان کا شمار صرف بالی ووڈ کی ہی نہیں بلکہ ہالی ووڈ کی بھی صف اول کی اداکاراؤں میں ہوتا ہے ، پریانکا اس قت ہالی ووڈ کے دو پروجیکٹ ’’اے کڈ لائک جیک‘‘اور ’’از اٹ ان رومینٹک‘‘میں مصروف ہیں۔
واضح رہے کہ وقت گزرنے کے ساتھ بالی ووڈ میں خواتین کے ساتھ صنفی امیتازبرتے جانے کے رجحان میں تبدیلی آرہی ہے، ماضی کے برعکس اب بالی ووڈ ہیروئنوں کو بھی اہمیت دی جارہی ہے جس کی مثال دپیکا پڈوکون ہیں جنہیں فلم ’’پدماوتی‘‘میں اداکار رنویر سنگھ اور شاہد کپور سے زیادہ معاوضہ دیا گیا ہے۔
