پاکستان ہاکی فیڈریشن کو آئندہ ماہ بھارت میں ہونیوالے جونیئر ہاکی ورلڈ کپ میں شرکت کیلئے حکومت کی اجازت مل گئی ۔ٹیم کو بھارت روانگی کیلئے ویزے کا انتظار ہے ۔
جونیئر ہاکی ورلڈ کپ آٹھ سے اٹھارہ دسمبر تک بھارت کے شہر لکھنو میں کھیلا جائے گا ۔ پاکستان ہاکی فیڈریشن کے سیکریٹری شہباز احمد نے تصدیق کی ہے کہ ایونٹ میں شرکت کےلیے پاکستان اسپورٹس بورڈ کو وزارت داخلہ سے این او سی موصول ہوگیا ہے۔
انہوں نے کہا کہ فیڈریشن کھلاڑیوں کے ویزوں کے لئے پہلے ہی اپلائی کرچکی ہے اور وقت پر ویزے ملنے کی صورت میں پاکستان جونیئر ہاکی ٹیم پانچ دسمبر کو لکھنوو پہنچ جائے گی ۔
جونیئر ورلڈ کپ میں پاکستان کا پہلا میچ 9 دسمبر کو نیدرلینڈز کیخلاف ہے ۔
