اسلام آباد(نمائندہ یس نیوز) پاکستان ریلوے کا یکم ستمبر سے ای ٹکٹنگ سسٹم شروع کرنے کا فیصلہ، مسافروں کو گھر بیٹھے اپنی ٹکٹ بک کرانے کی سہولت میسر آئے گی۔ ریلوے ذرائع کے مطابق ابتدائی طور پر لاہور سے راولپنڈی کے درمیان چلنے والی ریل کار اور اسلام آباد سے کراچی کے درمیان گرین لائن ٹرین میں ای ٹکٹنگ سروس شروع کی جائے گی، کامیاب تجربے کے بعد اس کا دائرہ تمام ٹرینوں تک بڑھا دیا جائے گا ای ٹکٹنگ کے اجرا کے بعد ریلوے مسافر گھر بیٹھے اپنی ٹکٹ بک کرا سکیں گے اور مسافروں کو ایس ایم ایس کے ذریعے ٹکٹ کوڈ بھیج دیا جائے گا۔ ذرائع کے مطابق ریلوے میں ای ٹکٹنگ سروس شروع ہونے سے بلیک ٹکٹنگ کے خاتمے میں مدد ملے گی ، ای ٹکٹنگ کے حوالے متعلقہ عملے کی ٹریننگ جاری ہے۔
