مظفرگڑھ……….مظفرگڑھ میں پیپلزپارٹی کے رکن قومی اسمبلی نور ربانی کھر کے گارڈ کی مبینہ فائرنگ سے چرواہا زخمی ہوگیا۔واقعے کا مقدمہ گارڈ سمیت تین افرادکے خلاف درج کرلیاگیاہے۔
گزشتہ شام مظفرگڑھ کے علاقے سنانواں کی شکار گاہ میں بکریاں چَرانے پر چرواہے کو فائرنگ کرکے زخمی کردیاگیا۔زخمی چرواہے الطاف حسین کو پہلے مقامی اسپتال اورپھر نشتر اسپتال ملتان منتقل کیاگیا ۔ الطاف حسین کےمطابق فائرنگ شکارگاہ کے مالک پیپلزپارٹی کے رکن قومی اسمبلی نورربانی کھر کےگارڈز نے کی۔نور ربانی کھر سابق وزیر خارجہ حناربانی کھر کے والد ہیں ۔ولیس نے چرواہے کی مدعیت میں تھانہ سنانواں میں گارڈ ریاض اوردونامعلوم افرادکے خلاف اقدام قتل کا مقدمہ درج کرلیاہے۔ڈی پی اوملک اویس احمد نے جیونیوزکو بتایا کہ ابتدائی تفتیش میں ایسی کوئی بات سامنے نہیں آئی کہ فائرنگ کا حکم رکن قومی اسمبلی نے دیا ۔تاہم مختلف پہلوؤں سے اس واقعے کی تفتیش کی جارہی ہے۔
