لیوٹن برطانیہ (تیمور لون) جموں کشمیر نیشنل عوامی پارٹی مظفرآباد کے رہنماؤں جناب فضل محمود بیگ اور دیگر پر آقاؤں کی خوشنودی کی خاطر مقامی انتظامیہ کی طرف سے بنائے جانے والے مقدمات کی بھرپور مذمت کرتے ہیں ہم مقبول بٹ شہید کے پیروکار ہیں ہمارے قائد نے وطن کی آزادی کی خاطر ہر قابض کے ظلم و جبر کا مقابلہ کیا ہے اور ہر پار قابضین کی طرف سے بنائے گے۔
مقدمات کی پرواہ نہ کرکے قومی آزادی کی جدوجہد کو ہر صورت جاری رکھ کر آزادی کے متوالوں کیلئے عملی جدوجہد کی صورت وہ شمع آزادی جلا دی کہ جو فقط دھرتی ماں جموں کشمیر کی قومی آزادی کی منزل پر منتج ہوکر رہے گی۔ ہم مظفر آباد انتظامیہ سے بھرپور احتجاج کر تے ہوئے مطالبہ کرتے ہیں کہ جموں کشمیر نیشنل عوامی پارٹی کے رہنماؤں پر بنائے گے مقدمات جلد از جلد ختم کئے جائیں۔ ہم کارکنان کے خلاف کسی قسم کی ریاست گردی برداشت نہیں کریں گے۔
ان خیالات کا اظہار جموں کشمیر نیشنل عوامی پارٹی کے مرکزی رہنما شوکت مقبول بٹ ایڈووکیٹ، جموں کشمیر نیشنل عوامی پارٹی برطانیہ کے صدر محمود کشمیر، جنرل سیکرٹری آصف مسعود چوہدری نے اخباری نمائندگان کو پارٹی کی برطانیہ برانچ کے پالیسی بیان میں کیا ہے انہوں نے کہا ہے کہ اگر نیپ کے رہنماؤں پر سے جلد از جلد مقدمات ختم نہ کئے گے تو پارٹی ریاست بھر میں اور عالمی سطح پر بھر احتجاجی تحریک چلائے گی بیرون ممالک پاکستانی سفارتخانوں کے سامنے احتجاجی مظاہروں کا سلسلہ شروع کیا جائے گا۔
وطن کی آزادی و خودمختاری کے حق میں نعرے بازی تقاریر، جلسے، جلوس قوموں کے بنیادی حقوق میں سے ہے آزادی کے حق میں جدوجہد کرنے کی پاداش میں اپنی ہی ریاست کی انتظامیہ کی طرف سے قابضین آقاؤں کی خوشنودی کی خاطر مقدمات بنانا قابل شرم فعل ہے رہنماوں نے مزید کہا کہ مادروطن جموں کشمیر کی قومی آزادی اور طبقات سے پاک خوشحال معاشرہ کے قیام تک ہماری جدوجہد جاری و ساری رہے گی۔
