ممبئی (جیوڈیسک) بالی ووڈ کو کئی کامیاب فلمیں دینے والے شاہ رخ خان اور کاجول کی جوڑی 5 سال بعد پھر فلم میں ایک ساتھ جلوہ گر ہورہی ہے۔
بھارتی میڈیا کے مطابق بالی ووڈ کے معروف ہدایت کار روہت شیٹھی کی فلم دل والے کے نام سے فلم بنارہے ہیں، فلم میں مرکزی کردار شاہ رخ خان اور کاجول ادا کریں گے جو 2010 کے بعد ایک بار پھر بڑی اسکرین پر ایک ساتھ نظر آئیں گے۔ فلم کی شوٹنگ رواں ماہ ہی شروع ہورہی ہے۔ شاہ رخ خان اور کاجول کے علاوہ فلم میں ورون دھون، ونود کھنہ، کبیر بیدی، جونی لیوراور کیرتی سنون بھی شامل ہیں، اس کے علاوہ فلم میں کاجول کے شوہر اجے دیوگن بھی اسپیشل انٹری دیں گے۔
واضح رہے کہ شاہ رخ خان اور کاجول کی جوڑی بازیگر، دل والے دلہنیا لے جائیں گے، کچھ کچھ ہوتا ہے، کبھی خوشی کبھی غم اور مائی نیم از خان جیسی کامیاب فلموں میں ایک ساتھ کام کرچکے ہیں۔ ’’دل والے دلہنیا لے جائیں گے‘‘ گزشتہ 20 سال سے ممبئی کے ایک سینما میں دکھائی جارہی ہے۔
