نئی دہلی (یس ڈیسک) گذشتہ سال اپنی ڈیبیو فلم ہیروپنتی میں ہیرو گری دکھاکر راتوں رات شہرت کی بلندیوں پر پہنچنے والے بالی ووڈاداکار اور مارشل آرٹسٹ ٹایئگر شروف 2 مارچ کو 25 ویں سالگرہ منائیں گے۔
2 مارچ 1990ءکو بالی ووڈ کے مایہ ناز اداکار جیکی شروف کے گھر جنم لینے والے ٹائیگر شروف نے اپنے بالی ووڈ کیرئیر کا آغاز گذشتہ سال فلمساز و ہدایتکار ساجد نڈیاڈوالا کی فلم ہیروپنتی سے کیا جس میں ان کے مدِ مقابل نئی ہیروئین کیرتی سنن نے مرکزی کردار ادا کیا۔
پہلی ہی فلم میں شاندار ڈانسنگ اور بے مثال اسٹنٹس کا مظاہرہ پیش کرنے والے ٹائیگر شروف راتوں رات نوجوانوں کے دلوں کی دھڑکن بن گئے جنہیں اس فلم کیلئے ناصرف ناقدین کی جانب سے پذیرائی بلکہ کئی ایوارڈ سے بھی نوازا گیا۔ ٹائیگر کی آنے والی فلموں میں باغی اور ریموا ڈی سوزا کی فلم شامل ہے جو کہ بہت جلد بڑے پردے کی زینت بنے گی۔
