جنوبی وزیرستان میں انٹیلی جنس پر مبنی آپریشن
سیکیورٹی ذرائع کے مطابق خیبر پختونخوا کے علاقے جنوبی وزیرستان میں عزمِ استحکام کے وژن کے تحت ایک انٹیلی جنس بیسڈ آپریشن کیا گیا۔ اس کارروائی میں فتنہ الخوارج سے وابستہ پانچ دہشت گرد مارے گئے۔
ذرائع نے بتایا کہ آپریشن کے دوران دہشت گردوں کے ٹھکانوں کو نشانہ بنا کر تباہ کر دیا گیا۔ ہلاک ہونے والوں کے قبضے سے بھاری مقدار میں اسلحہ اور گولہ بارود برآمد ہوا۔
سیکیورٹی ذرائع کا کہنا تھا کہ انٹیلی جنس بیسڈ آپریشنز سے دہشت گردوں کو انسانی اور بنیادی ڈھانچے کے لحاظ سے بھاری نقصان پہنچا ہے۔
بلوچستان میں دو علاقوں میں کارروائیاں
بلوچستان میں سیکیورٹی فورسز نے گورنڈر اور ماشکیل کے علاقوں میں فتنہ الہندوستان کے دہشت گردوں کے خلاف کارروائیاں کیں۔ ان آپریشنز کے نتیجے میں چھ دہشت گرد ہلاک ہو گئے۔
سیکیورٹی ذرائع کے مطابق ماشکیل میں دہشت گردوں نے سیکیورٹی چیک پوسٹ پر فائرنگ کی اور فرار ہونے کی کوشش کی۔ فورسز نے فوری جوابی کارروائی کرتے ہوئے فرار ہونے والے دہشت گردوں کو ہلاک کر دیا۔
ذرائع نے بتایا کہ یہ کارروائیاں آپریشن ردالفتن 3 اور عزمِ استحکام کے وژن کے تحت عمل میں لائی گئیں۔
امن کے قیام کا عزم
سیکیورٹی فورسز نے ملک بھر میں دہشت گردی کے خاتمے اور دیرپا امن کے قیام کے لیے اپنے عزم کا اعادہ کیا ہے۔
