ممبئی: بھارتی کوریوگرافر بوسکو نے انکشاف کیا ہے کہ اداکارہ کترینہ کیف کو اپنے کیریئر کے آغاز میں ڈانسنگ کے حوالے سے سخت تنقید کا سامنا کرنا پڑا اور ایک کوریوگرافر نے انہیں ڈانسنگ میں صفر قرار دیتے ہوئے یہاں تک کہہ دیا تھا کہ وہ ڈانس کرنا چھوڑ دیں۔
فرح خان کے انٹرویو میں انکشاف
بھارتی میڈیا رپورٹس کے مطابق کوریوگرافر بوسکو اور سیزر حال ہی میں ہدایت کار اور کوریوگرافر فرح خان کے ایک انٹرویو میں شریک ہوئے، جہاں انہوں نے کوریوگرافی کے سفر اور فرح خان کے ساتھ کام کرنے کے تجربات پر گفتگو کی۔
گفتگو کے دوران فرح خان نے بتایا کہ شیلا کی جوانی ان کی کوریوگراف کردہ سب سے کم خرچ گانے کی پرفارمنس تھی، کیونکہ یہ گانا صرف 10 لڑکوں اور اداکارہ کترینہ کیف کے ساتھ شوٹ کیا گیا تھا۔
شیلا کی جوانی ثابت ہوا گیم چینجر
بوسکو نے کہا کہ آئٹم سانگ شیلا کی جوانی کترینہ کیف کے کیریئر کے لیے گیم چینجر ثابت ہوا۔ فرح خان نے بھی اس بات سے اتفاق کیا کہ یہ واقعی ایک ٹرننگ پوائنٹ تھا، تاہم انہوں نے مزید کہا کہ اس وقت انہیں معلوم نہیں تھا کہ کترینہ ڈانس کر سکتی ہیں۔
ابتدائی کیریئر کی تلخ یاد
اداکارہ کے ابتدائی کیریئر کو یاد کرتے ہوئے بوسکو نے بتایا کہ کترینہ کیف کو ایک کوریوگرافر کی جانب سے توہین کا سامنا کرنا پڑا، جس نے انہیں کہا تھا کہ ڈانسنگ کے معاملے میں وہ صفر ہیں اور انہیں ڈانس کرنا چھوڑ دینا چاہیے۔
واضح رہے کہ کترینہ کیف نے بعد ازاں اپنی محنت اور مسلسل مشق کے ذریعے بالی ووڈ کی نمایاں ترین ڈانسرز میں اپنی جگہ بنائی، اور شیلا کی جوانی سمیت متعدد مقبول ڈانس نمبرز میں اپنی صلاحیت کا مظاہرہ کیا۔
