نواز شریف کی جانب سے حتمی نامزدگی کا اعلان
اسلام آباد: پاکستان مسلم لیگ (ن) کے صدر محمد نواز شریف نے بیرسٹر سید افتخار علی گیلانی کو آزاد جموں و کشمیر کے وزیراعظم کے منصب کے لیے نامزد کر دیا ہے۔ یہ اعلان مسلم لیگ (ن) کی سیکرٹری اطلاعات مریم اورنگزیب نے جمعرات کو کیا۔
مریم اورنگزیب کے مطابق آزاد کشمیر میں حکومت سازی کے حوالے سے مشاورت وزیراعظم ہاؤس میں مکمل کر لی گئی ہے اور گیلانی کا نام اعلیٰ آئینی عہدے کے لیے حتمی طور پر طے پا گیا ہے۔
کاغذات نامزدگی جمع کرانے کی ہدایت
انہوں نے بتایا کہ نواز شریف نے بیرسٹر افتخار گیلانی کو ہدایت کی ہے کہ وہ آزاد جموں و کشمیر کے وزیراعظم کے انتخاب کے لیے اپنے کاغذات نامزدگی جمع کرائیں۔
سماجی رابطے کی ویب سائٹ پر جاری بیان میں مریم اورنگزیب نے لکھا کہ پاکستان مسلم لیگ (ن) کے صدر محمد نواز شریف نے بیرسٹر سید افتخار علی گیلانی کو آزاد جموں و کشمیر کی وزارت عظمی کے عہدے پر انتخاب کے لیے کاغذات نامزدگی جمع کرانے کی ہدایت کی ہے۔
وزیراعظم ہاؤس میں اہم مشاورتی اجلاس
قبل ازیں وزیراعظم شہباز شریف کی زیر صدارت آزاد جموں و کشمیر میں نئی حکومت کی تشکیل کے حوالے سے اہم اجلاس منعقد ہوا۔ اجلاس میں سینیٹر رانا ثناء اللہ، خواجہ سعد رفیق، مسلم لیگ (ن) آزاد کشمیر کے صدر شاہ غلام قادر اور سابق وزیراعظم راجہ فاروق حیدر نے شرکت کی۔
اجلاس میں نو منتخب اسپیکر چوہدری طارق فاروق، ڈپٹی اسپیکر احمد رضا قادری اور ٹیکنوکریٹ نشست پر منتخب ہونے والے بیرسٹر افتخار گیلانی بھی موجود تھے۔
نئی کابینہ اور حکومتی ترجیحات پر غور
اجلاس میں آزاد کشمیر میں مسلم لیگ (ن) کی حکومت کی تشکیل سے متعلق اہم فیصلوں کے ساتھ ساتھ پارٹی کی آئندہ پارلیمانی حکمت عملی پر بھی تبادلہ خیال کیا گیا۔
شرکاء نے نئی کابینہ کی تشکیل، حکومتی ترجیحات، گڈ گورننس اور انتظامیہ کی کارکردگی بہتر بنانے کے اقدامات پر بھی غور کیا۔
واضح رہے کہ آزاد جموں و کشمیر قانون ساز اسمبلی میں نئے وزیراعظم کا انتخاب 28 اگست کو ہونا ہے۔
