وزیراعظم شہباز شریف کا صدر ٹرمپ کے حمایتی بیان پر اظہار تشکر
اسلام آباد: وزیراعظم شہباز شریف نے معاہدہ دفاع مشترکہ مکہ مکرمہ پر دستخط کے حوالے سے امریکی صدر ڈونلڈ ٹرمپ کے حمایتی بیان کو سراہا ہے اور اس پر ان کا شکریہ ادا کیا ہے۔
سماجی رابطے کی ویب سائٹ ایکس پر جاری اپنے پیغام میں وزیراعظم شہباز شریف نے کہا کہ میں صدر ڈونلڈ ٹرمپ کے معاہدہ دفاع مشترکہ مکہ مکرمہ پر دستخط سے متعلق حمایتی الفاظ پر ان کا تہہ دل سے مشکور ہوں۔
پاکستان، سعودی عرب اور ترکیہ کا تعمیری کردار جاری رہے گا
انہوں نے کہا کہ پاکستان، برادر اسلامی ملک سعودی عرب اور جمہوریہ ترکیہ کے ساتھ مل کر اپنے ممالک اور پورے خطے کے دفاع کو یقینی بنانے میں تعمیری کردار ادا کرتا رہے گا۔
وزیراعظم نے مزید کہا کہ میں ایک بار پھر صدر ٹرمپ کی جرات مندانہ اور فیصلہ کن قیادت کو سراہتا ہوں جس نے جنوبی ایشیا میں ایٹمی تباہی کو ٹالنے اور لاکھوں جانوں کو بچانے میں مدد کی۔
پائیدار امن خوشحال مستقبل کی بنیاد ہے، وزیراعظم
انہوں نے اس بات پر زور دیا کہ پائیدار امن ہماری عوام کے روشن اور خوشحال مستقبل کے لیے سب سے بنیادی شرط ہے۔
قبل ازیں امریکی صدر ڈونلڈ ٹرمپ نے سعودی عرب، ترکیہ اور پاکستان کے درمیان حالیہ مشترکہ دفاعی معاہدے کا خیرمقدم کرتے ہوئے اسے خطے میں سیکیورٹی تعاون کے حوالے سے ایک اہم پیش رفت قرار دیا تھا۔
ٹرمپ کا معاہدے کو بڑا اور اہم قدم قرار دینا
امریکی صدر نے اپنے سوشل میڈیا پیغام میں کہا تھا کہ یہ ایک بڑا، جرات مندانہ اور اہم پہلا قدم ہے، یہ ظاہر کرتا ہے کہ مشرق وسطیٰ کس طرح متحد ہو رہا ہے اور ممالک آخر کار اپنا دفاع زیادہ بہتر طریقے سے کر سکیں گے۔
یہ معاہدہ خطے میں بدلتے ہوئے سیکیورٹی منظرنامے کے تناظر میں سامنے آیا ہے اور اسے تینوں ممالک کے درمیان دفاعی تعلقات میں ایک اہم سنگ میل قرار دیا جا رہا ہے۔
