اسلام آباد(ایس ایم حسنین) بھارت اسلامی تعاون تنظیم کی قرارداد میں ظاہر کی جانے والی عالمی برادری کی تشویش پر اعتراض کی بجائے غیر قانونی زیر قبضہ جموں وکشمیر میں اپنی ریاستی دہشت گردی کا سلسلہ بند کرے۔ وزارت خارجہ نے اسلامی تعاون تنظیم کے اعلامیے پر بھارتی اعتراض کو غیرمنطقی قرار دیا ہے اور اسے مسترد کرتے ہوئے کہا ہے کہ پاکستان نے تنازع جموں وکشمیر کے بارے میں اسلامی تعاون تنظیم کے وزرائے خارجہ کی کونسل کے 47ویں اجلاس کی قرارداد سے متعلق بھارتی وزارت خارجہ کے غیرمنطقی بیان کو مسترد کر دیا ہے۔ترجمان دفترخارجہ کے ترجمان زاہدحفیظ چودھری نے ایک بیان میں کہا کہ جموں وکشمیر اقوام متحدہ کی سلامتی کونسل کے ایجنڈے پر موجود عالمی طور پر مسلمہ قدیم ترین تنازعات میں سے ایک ہےانہوں نے کہا کہ بھارت کی ہٹ دھرمی اور اقوام متحدہ کی سلامتی کونسل کی قراردادوں اور پاکستان کشمیریوں اور عالمی برادری کے ساتھ کئے گئے وعدوں پر عملدرآمد سے راہ فرار اختیار کرنے کے باعث یہ تنازع تا حال حل طلب ہے۔ ترجمان نے کہاکہ اسلامی تعاون تنظیم کی قراردادبھارت کے اس غیر قانونی اور غیر منطقی موقف کی تردید ہے کہ جموں وکشمیر اس کا داخلی معاملہ ہے۔
پاکستان نے بھارتی وزارت خارجہ کے بیان کو مسترد کردیا
