اسلام آباد(ایس ایم حسنین) دنیا فخری زادہ کے قتل پر انسانی حقوق کے دعویداروں کے رد عمل کا انتظار کر رہی ہے۔یہ بات اسلام آباد میں قائم ایران کے سفارتخانے کی طرف سے جاری بیان میں کہی گئی۔ سفارتخانے کی طرف سے اعلی ایرانی سائنسدان کے قتل میں صہیونی ریاست کے کردار پر تبصرہ کرتے ہوئے کہا کہ محسن فخری زادہ ایران کے سرکاری عہدیدار تھے لہذا ان کا قتل، بین الاقوامی قوانین کی کھلی خلاف ورزی سمیت اقوام متحدہ کے چارٹر اور تمام بین الاقوامی اصولوں کیخلاف ہے۔ بیان میں کہا گیا ہے کہ فخری زادہ کے علاوہ کچھ ایرانی شہری بھی شہید اور زخمی ہوگئے ہیں جس کی وجہ سے یہ حملہ انسانی حقوق اور زندگی کے حق کیخلاف اقدام ہے۔ ایرانی سفارتخانے نے اس قتل میں ناجائز صہیونی ریاست کے کردار پر زور دیتے ہوئے کہا کہ اس حملے کی ذمہ داری صہیونی ریاست اور اس کے اتحادیوں پر عائد ہوتی ہے۔ بیان میں مزید کہا گیا ہے کہ یہ قتل صیہونی ریاست کے ایران اور خطے میں ہونے والے قتل و غارت گری کے سلسلے کا حصہ ہے اور اسی وجہ سے اسے ریاستی دہشت گردی سمجھا جاتا ہے۔ بیان میں اس بات پر زور دیا گیا ہے کہ توقع کی جاتی ہے کہ انسانی حقوق کے دعویدار ممالک اس دہشتگردی کاروائی کیخلاف مناسب رد عمل ظاہر کریں۔ واضح رہے کہ ایران کے ایٹمی پروگرام کے بانی سائنسدان محسن فخری زادہ کو 27 نومبر میں تہران میں ایک دہشتگردانہ حملے میں شہید کر دیا گیا۔
ایران کے دارالحکومت تہران کے علاقے دماوند میں مسلح افراد نے ایرانی سائنسدان کی گاڑی پر حملہ کیا؛ حملہ آوروں نے ان کی گاڑی کے قریب دھماکا اور فائرنگ کی جس کے نتیجے میں سائنس دان محسن فخری زادہ شدید زخمی ہوگئے، اُنہیں قریبی اسپتال منتقل کیا گیا تاہم وہ جانبر نہ ہوسکے۔
اسلامی جمہوریہ ایران کے وزیر خارجہ “محمد جواد ظریف” نے شہید فخری زادہ کے قتل کی ذمہ داری ناجائز صہیونی ریاست پر عائد کی ہے۔
ظریف نے ایک ٹوئٹر پیغام میں کہا کہ شہید فخری زادہ کے قتل میں ناجائز صہیونی ریاست کے ملوث ہونے کے ٹھوس شواہد موجود ہیں۔
اس کے علاوہ ایرانی سپریم لیڈر حضرت آیت اللہ خامنہ ای نے بھی ایٹمی اور دفاعی شعبے میں اعلی ایرانی سائنسدان کی شہادت میں ملوث افراد کی شناخت اور سزا دینے پر زور دیا۔
قابل ذکر ہے کہ محسن فخری زادہ ایران کی وزارت دفاع کی ریسرچ اورانوویشن تنظیم کے سربراہ تھے اور وہ ایران کے سینیئر ترین ایٹمی سائنسدان تھے؛ محسن فخری زادہ کا شمار ایران کے ایٹمی پروگرام کے بانیوں میں ہوتا ہے
