اسلام آباد(ایس ایم حسنین) حکومت پاکستان کی طرف سے افغان شہریوں اور طلبا وطالبات کیلئے نئی ویزا پالیسی کے نفاذ کے بعد کابل میں پاکستانی سفارتخانے کے عملے کو بڑی تعداد میں افغان شہریوں کے پاسپورٹس وصول ہونا شروع ہوگئے ہیں۔ اس سلسلے میں کابل میں پاکستانی سفیر منصور احمد خان نے ٹوئٹر پر ایک تصویر شیئر کی جس میں سفارتخانے کے احاطے میں سینکڑوں افغان طلبا وطالبات موجود ہیں اور ویزوں کےلیے اپنے پاسپورٹس جمع کروا رہے ہیں۔حکومت پاکستان کی طرف سے علامہ اقبال اسکالرشپ پروگرام کے تحت 3000 افغان طلبا وطالبات منتخب کیے گئے تھے۔سفیر منصور احمد خان نے لکھا کہ افغان طلبا وطالبات پاکستان کی یونیورسٹیوں اور کالجوں میں شمولیت کے لئے جلد ہی پاکستان کا سفر کریں گے۔ واضح رہے کہ 3000افغان شہریوں کو دی گئی سکالر شپس پر ہائر ایجوکیشن کمیشن 7٫115 ارب روپے خرچ کریگا۔
